Nunanit allanit

Canadami indianerit USA-mi indianerit tapersersoraat

Indianerit Canadamiut Amerikami indianerit tapersersorniarlugit Montrealimi ikaartarfik angallaffiusupilussuaq assersorpaat.

Allattoq Marianne Stenbæk, Montreal, Canada

oktobarip 31-at 2016 08:22

Nutserisoq Simon Uldum -

Naalagaaffimmi North Dakotami sioux-indianerit uuliap aqqutissaata sanaartorniarneqarnera akerleralugu apriilip qaammataanili akerliussutsiminnik takutitsisarput.

Suliffeqarfik Dakota Access Pipeline North Dakotami naalagaaffiit arlallit aqqusaarlugit naalagaaffimmi Illinoisimi akuiaavimmut uuliap aqqutissaanik sanaartortussaavoq.

Sioux-indianerit reservatiat, Standing Rock, USA-mi reservatit anginersaasa ilagaat. Nunalu tamanna 1868-imi isumaqatigiissut naapertorlugu sioux-indianerinit pigineqarpoq.

Uuliap aqqutissaanut akerliusut Standing Rockimi tupeqarfiliorsimapput, aamma amerikamiut politiivinut sakkutuuinullu aporaannerit amerlasimaqaat.

Aamma atuaruk VIDEO USA-mi indianerit 100-t sinneqartut politiinit tigusarineqartut

Akerliussutsiminnik eqqissisimasunik takutitsisut sisamanngormat saassunneqaqqipput akerliusullu inuusuttut arlallit ikiligaallutik.

Tamanna pissutigalugu Mohawk-indianerit Montrealip eqqaani reservatimi Kaknawakemeersut Montrealimi ikaartarfiit pingaarnerit ilaat reservatimik ilaanniittoq tallimanngormat assersulerpaat.

Assersuineq akunnernik marluinnarnik sivisussuseqaraluarluni Montrealimi angallannermut akornusersuuutaangaatsiarpoq.

Mohawk-indianerit Canadamilu nunap inoqqaavi allat amerikami indianerit tapersersorniarlugit akerliussutsimik takutitsinernik arlalinnik ingerlataqarniarlutik neriorsuutigaat.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.