Canadami indianerit sakkutuunit nakkutigineqarput

Illersornissamut ministeriaqarfimmi immikkoortortaqarfik, peqqarniisaarnianik kilitsissianillu nakkutiginninnermik suliaqartoq, nunap inoqqaavinik nakkutiginnittuusoq uppernarsarneqarpoq.

Aviisi naapertorlugu indianerit nakkutigineqarput, naggueqatigiilli Inuit aamma nakkutigineqarnersut suli uppernarsineqanngilaq.

Immikkoortortaqarfik indianerit siunissami pilersaarutaat pillugit siorna arfineq-pingasunik nalunaarusiorsimasoqThe Globe and Mailimi allaaserineqarpoq.

Akerliussutsimik takutitsinissamik pilersaarutit, aqqusinernillu assersuinissamik pilersaarutit pillugit nalunaarusiortoqarsimavoq, illersornissamulli ministereqarfik allanik aamma nalunaarusiortarsimasoq, sakkutuut naalagaasa ilaat David Scanlon The Globe and Mailimut oqarpoq.

Indianerit immikkut ittumik nakkutigineqarnerannut takussutissaqartoq, tusarfiit atiminnik saqqummiusserusunngitsut Radioaviisimit oqaloqatigineqarsimapput, nakkutiginnittoqarneralu qangalili pasitsaanneqarsimasoq aamma oqaatigineqarluni.

Indianerit ukiut qulit kingulliit ingerlaneranni assigiinngitsutigut iliuuseqartarsimapput, assersuutigalugu aqqusinernik assersuisarsimallutik, soorlu aamma ikaartarfinnik assersuisarlutik, sakkutuut akuliuffigisariaqagaannik.