Canadami indianerit Inuillu ernummateqarput
Nappaat siullermik takkusimaarmat nunap inoqqaavi, 50-it missaannik toqusortaqarlutik eqqugaanerpaapput. Eqqugaanerpaat tassaallutik indianerit nunaqarfii naalagaaffiup immikkoortuani Manitobamiittut aamma naggueqatigiit Inuit nunaqarfii Hudsonip Kangerliumanersuata kimmut sineriaani Kivallermiittut.
Naggueqatigiit Inuit indianerillu nappaammit eqqugaasut amerlanerujussui pissutigalugit Canadami peqqissutsimut ministerip, Leona Aglukkap, naggueqatigiinnit Inunneersup, indianerit naggueqatigiillu Inuit aallartitaat ippassaani ataatsimeeqatigai, puulukit nappaataata takkuteqqinnissaa naatsorsuutigineqarmat.
Leona Aglukkaq isumalluarpoq, oqaatigalugulu Canadami naalakkersuisut iliuuserisinnaasatik iliuuserisimagaat. Tamannali naggueqatigiinnit Inunnit indianernillu isumaqatigineqanngilaq, taakkumi isumaqaramik imminerminnut tunngatillugu iliuuseqartoqanngippallaarsimasoq, tassami Canadamiunut allanut naleqqiullutik eqqugaanissamut qaninnerugamik. Nunaqarfiit ilarpassuini imermik pilersuineq ajorluinnarmat, sukkorneq puakkullu nappaatit atugaaqimmata, taamaalillunilu tunillatsinnissaq ajornannginnerulerluni. Tamakkua saniatigut meeqqat arnallu naartusut tunillatsinnissamut ulorianartorsiorput, illoqarnikkullu pissutsit ajorluinnartut pitsaanerulersitsinngillat.
Ataatsimeeqatigiinnermi indianerit aamma naggueqatigiit Inuit peqataatitaasa peqqissutsimut ministerimut piumasaraat, ministeri "puussianik" puulukit nappaataanut illersuutaasinnaasunik imalimmik aningaasaliillunilu agguaasseqqullugu. Taakkua imarissallugit qanermut assiaqutit, aaqqatit, assannut qaqorsaatit, iisartakkat kissarneqarnermut appaallatsitsisinnaasut kissarnersiullu...tamakkumi tamarmik tunillatsissimanermik pasitsaassaqaraanni iluaqutaasinnaammata. Puussiat tamakkuninnga imallit Manitobami indianernut agguaanneqareersimapput. Kissaatigineqarnerpaarli tassaavoq, nunaqarfinni tamani piaarnerpaamik akiuussutissamik kapuisoqarnissaa.
