Canadami inatsisit FN-ip isumaqatigiissutaa naapertussavaat
Canada tamakkerlugu nunarsuarmilu sumiiffinni assigiinngitsorpassuarni, Nunarput ilanngullugu, eqqillit akerliuniaqatigiit Idle No More taperserlugit ataasinngormat akerliussutsimik takutitsisoqarpoq.
Canadami inatsisartut upernaakkut ataatsimiinnerat aamma ataasinngormat aallartippoq, Robert Saganashillu inatsisissatut siunnersuutaa siulliit ilaattut saqqummiunneqarluni.
Robert Saganash cree-indianerivoq nunallu immikkoortuanit Quebecimeersuulluni.
Taassuma inatsisissatut siunnersuutaata siunertaraa, Canadami inatsisit FN-ip nunap inuii pillugit isumaqatigiissutaanut, Canadap atsiorsimasaanut, naapertuinissaat. Ilaatigut Danmark aamma taamaaliorsimavoq.
Saganash inatsisissatut siunnersuummik saqqummiussilluni oqarpoq, Harperip naalakkersuisuutitaasa iliuuseqarnissaannut Canadamilu Indianerinut, Metisinut Inunnullu ataqqinninnerusumik attaveqalernissaannut piffissanngortoq. Canadami nunap inuiisa, aali Canadami pisoorsuarmi najugaqartuugaluarlutik, ilungersorlutik pissakitsitaallutillu atugaqartitaanertik qatsuppaat, Saganash oqarpoq.
Inuit pisinnaatitaaffii pillugit isumaqatigiissummut ilaatinneqartut ilaatigut tassaapput nunamut imermullu tunngatillugu pisinnaatitaaffiit kiisalu oqaatsinut kulturimullu tunngatillugu pisinnaatitaaffiit.
