Canadami immami qaarnersuaq eqqumiigineqarpoq
Canadami qullersat piniartunit naggueqatigiinnit Inunnit Nunavummeersunit sapaatip-akunnera kingulleq nalunaarutinik arlalinnik nassinneqarput taakku oqaluttuarsimapput ungaseqisumiit immamiit qaarnersuartut ittoq takusimagitsik, qaarnersuarlu qaareermat qernertorsuarmik pujortorujussuanngorsimasoq.
Piniartullu taakku nalunaarutaat naapertorlugu ilimagineqarpoq qilalugarpassuit immamiittut qaarnerup piliaanik toqunneqarsimassasut.
Canadamiut timmisartoq atorlugu nakkutilliisui tallimanngormat qaarnerup nalaanukartinneqarput, malunnartorsisimanngillalli.
Taakku qaartoqarsimaneranik malunnartorsinngillat aammalu qilalukkanik toqungasunik nassaarsimannginnerarlutik.
- Sapaatip-akunnerata missaata matuma siorna immami qaartoqarsimappat tupinnanngilaq malunnartorsisoqarsimassanngippat, tassami qilalukkat toqusimagunik kivereersimassapput nannuniilluunniit nerineqareersimassapput, taama Nunavummi politiit oqarput.
Canadamiulli sakkutuuisa qaartoqarneranik nalunaarutit upperiumannginnerarsimagaat, nittartagaq canada.com allaaserinnippoq.