Canadami HIV-qarneq isertuunneqartarpoq

Canadami innuttaasut peqqissusaannik misissuisoqarmat, HIV-mik AIDS-imillu tunillanneqartut sisamaat eqqiliusartoq, nunalluunniit inuiisa kinguaarisaraat, paasineqarpoq.

Canadami naggueqatitta arnartaasa kattuffianni peqqinnissaqarfimmi sulisoq CBC-mut oqarpoq, naggueqatitta akornanni HIV-ertut nappaatiminnik isertuussisartut amerlasoorujussuusut.

Naggueqativut najugaqarfimminni nappaateqarnerlutik misissortikkusuttannginnerat tamatumunnga pissutaavoq. Peqqinnissaqarfimmi sulisup oqarnera malillugu, inuiaqatigiit ikittunnguit imminnut isertorfigisinnaanertik ajornakusoortittarpaat. Naggueqativut najugaqarfinnut annerusunut, soorlu illoqarfissuarnut, nuukkaangamik aatsaat misissortikkumasartut taassuma aamma erseqqissarpaa.

Nunat tamat aallartitaat AIDS pillugu Canadap illoqarfiisa ilaanni, Torontomi, sapaatip-akunnerani uani isumasioqatigiipput. Naggueqatitta HIV-imik nappaateqarnerminnik isertuussisarnerat isumasioqatigiinnermi qaqinneqarumaartoq, Canadami naggueqatitta arnartaasa kattuffianneersup neriuutigaa.