Canadami eqqillit nutaamik høvdingetaarput

Taasinerup naammassinissaa ulloq unnuarlu sivisutigingajappoq, Canadami eqqillit nuna tamakkerlugu kattuffianni The Assembly of First Nationsimi kina høvdinginngornersoq erseqqissumik paasinarsereerpoq. Tassa 42-nik ukiulik Shawn Atleo British Columbiameersoq Canadami qullersatut høvdinginngortoq, taamaalillunilu Assembly of First Nationsimi naalakkersuinikkut pissaneqarnerpaanngorluni.

Shawn Atleo eqqilinnit Ahousaht-init kingoqqisuuvoq taakkualu ukiuni kingullerni qulini pisortaaffigereerpai, taassuma eqqilittut aqqa tassavoq A-in-Chut.

Ilaqutai kinguaariippassuarni høvdingiusareerput, Shawn Atleoli inuusuttuuvoq nutaalerisorujussuullunilu. Australiami ilinniartitsisutut ilinniagaqarpoq, perorsaaneq silallu allanngoriartornera universitetimi atuarsimallugit. Taamaalilluni inuit qassissunnguit peqatigalugit silap allanngoriartornera qanoq nassuiarneqassanersoq Al Goremit ilinniagaqarfigai. Taamaattumik eqqillit pitsaanerusumik ilinniartitaanissaat pingaartitaasa ilagaat silallu allanngoriartorneranut annertuumik suliniuteqarluni.

Mary Simon, Canadami inuit kattuffianni Inuit Tapiriit Kanatami siulittaasoq, pilluaqqussummik nassiussivoq Canadamilu inuit Shawn Atleop qinigaaneranik nuannaarutiginninnerat oqaatigalugu.

- Ataatsimoortumik ajornartorsiutit kiisalu eqqillit inuillu atugaasa pitsaanerulersinnissaannut pillugit suleqatigiinnissaq qilanaaraara, Mary Simon oqarpoq.

Shawn Atleop Canadami høvdingit qullersaattut aaqqiagiinnginnernut taarsiullugu allatut nipilimmik isumaqatigiinniartarnissaq aallartinniarpaa.