Canadami atuartut saammaateqatigiinnissamut suliniuteqartut
Isumassarsiarineqartoq canadamiut nunap inoqqaavilu akornanni saammaateqatigiinnissamut aallaaveqarpoq.
Canadami Ilumoortussaq Saammaateqatigiinnissarlu pillugu Isumalioqatigiissitap siorna innersuussereernerata kingorna assigiinngitsunik suliniuteqartoqartalerpoq.
Kamippaallu puui suliniutigineqartut ilagaat.
Quebecimi atuarfimmi Gatineauimi 7. klassini 8. klassinilu atuartut taakkuninnga 100-nik katersisimapput. Atuartullu tamarmik immikkut kamippaat puuinik angerlaassipput atortullu assigiinngitsut taakkununnga poortuullugit.
Atuartup ulluinnarni pisariaqartissinnaasai, soorlu assersuutigalugit aqerluusat, assanut tarngutit allattaaviillu, poortuunneqarput. Taassumalu saniatigut atuartut allakkiannguaminnik juullimik inuulluaqqusipput.
Atuarfimmi ilinniartitsisoq, Jsee Lusigneau, suliniummut isumassarsisuuvoq.
Kamippaat puui 100-t sinnerlugit nunaqarfippassuarnut nassiunneqareerput, juullimillu taamatut inuulluaqqusineq saammaateqatigiinnissamut qularnanngitsumik iluaqutaassasoq, atuarfimmi oqaatigineqarpoq.
