Canadami atuarfinni najugaqarfiutigisuni atuartuusimasut taarsiivigineqaqqittut
Nutaarsiassaqartitsivik CBC News naapertorlugu atuartuusimasut 79.000-t missaanniipput taakkulu "aniguisimasunik" - "the survivors" ullumikkut taagorneqarput.
Taakku tamarmik immikkut Canadami naalakkersuisunit 3000 dollarsinik taarsiivigineqaqqissapput, tassalu 16.000 koruunit missaannik. Aningaasalli taakku atuartitsinermut ilinniartitaanermullu taamaallaat atorneqartussaapput, tamannalu pissutigalugu pingaartumik naggueqatigiit Inuit ilassutitut taarsiissutissanik qinnuteqaateqarnissartik tunuarsimaarfigaat, issittumi ilinniartitaanikkut neqeroorutit toqqarneqarsinnaasut amerlagisassaanngimmata.
Canadamili naalakkersuisut qinnuteqaateqarnissap tamanut siunertaqarnissaa anguniarlugu taarsiivigineqarnissamut malittarisassat allanngortippaat, assersuutigalugu amermik mersornermik ilinniarnissamut kiisalu inuusuttut piniarnermik aalisarnermillu pikkorissarnissaannut aningaasanik qinnuteqaateqartoqarsinnaanngorlugu.
Aningaasat aamma aallaaniarfimmi illuaraliornissamut atorneqarsinnaapput, taamaaliornikkut aallaaniarnissamut periarfissat pitsaanerulersinneqarsinnaallutik, aammalu oqaatsinik ilinniarnissaq periarfissaalerpoq.
Atuarfinni najugaqarfiutigisuni atuartuusimasunut aanaajusut. aataajusut, angajoqqaat qitornaasullu taarsiivigeqqinneqarnissamik qinnuteqaateqarsinnaapput, qinnuteqaateqarnissamullu piffissaliussaq Canadami naalakkersuisut upernaap tungaanut sivitsorsimavaat.