Canadami atuarfimmi aallasersortoqarnerani inuit sisamat toqutaapput
Inuit sisamat toqutaanerat, allallu arfineq-marluk ikilerneqarnerat soorunami alianarpoq. Illoqarfeeqqamili innuttaasut 2000-it missaanniittut, aallaasersortoqarnerata kingorna nukittusimaqaat.
Taamatut pisoqarnissaa La Lochemi innuttaasut soorlulusooq utaqqiinnarsimagaat, innuttaasut oqaatigaat. Nakuuserniartarnermi, imminut toqunneq, ikiaroornartunillu imigassamillu atornerluinerit ukiorpassuarni ajornartorsiutaasimapput.
Illoqarfeeraq La Loche indianerpassuarnik innuttaqarpoq, suliffissaaleqisorpassuaqarluni, inuusuttullu sunngiffimminni sammisinnaasassaminnik amigaateqarlutik, siunissamullu aamma isumalluartoqarpallaarani. Tarnimikkut nappaatillit La Lochemi ikiorneqarnissaminnik aamma amigaateqarput.
Indianerit inuusuttut ilaat, atiminik tunniusserusunngitsoq, KNR-imut oqarpoq naak pisoq alianaraluaqisoq, taava Canadami innuttaasunut paasinarsigunartoq indianerit nunallu inoqqaavisa atugaat ilaatigut pitsaavallaarneq ajortut, pingaartumik Canadap avannarpasinnerusortaani ajornartorsiutinut eqqummaarinnerusoqalersinnaasoq.
La Lochep iliveqarfiani maanna ikumaartitsisoqarpoq, aput aasserniarlugu ikumaartitsisoqarluni, toqutaasut ilisaasinnaanissaat pillugu ikumaartitsisoqarluni.