Canadami atuakkiortunut nersornaasiuttagaq nutaaq

Kalaallit Nunatsinni soorlu taamaattoqartoq, Canadap Issittortaani inuusuttut allannerusarnissaat sulissutigineqarpoq.
septembarip 19-at 2013 07:10

Indianerit, naggueqativut Inuit aamma metisit, pingaartumik nunap inoqqaavi inuusuttut, inuusuttulli canadamiut allat aamma, atuakkiornerup pingaaruteqassusiata pingaaruteqassusianik paasitinniarlugit nutaaliorluni akissarsititsisoqartalerniarpoq.

Akissarsiassaq nutaaq taaguuteqarpoq " The Burt Award for First Nations, Metis and Inuit Literature", ukioq-mannalu oktobarip ulluisa aappaanni siullermeerluni agguaanneqassaaq.

Isumassarsiat marluk akissarsititsinissami tunuliaqutaapput. Tassa indianerit, naggueqativut Inuit Metisillu atuakkiortut inuunertik misigisatillu pillugit atuakkiornissaannik kaammattorlugillu unammillertinniarpaat. Aamma nunap inoqqaavi inuusuttut suli amerlanerit atuarnerunissaasa qanoq pingaaruteqartiginera paasitikkusunneqarpoq, taakkumi atuartarnerat Nunatsinnisulli annertutiginngimmat.

Ajugaasup akissarsiassaa 60.000 koruunit sinnilaarlugit aningaasartaqassaaq. Atuakkap ajugaassutigineqartup 2.500-t sinnerlugit naqitertinneqartarnissaa aamma neriorsuutigineqarpoq, atuakkallu pitsaanerpaat tallimat Canadami atuarfinnut atuakkanillu atorniartarfinnut nassiussuuneqassapput, nunammi inoqqaavisa najugaqarfiinut tamakku nassiussuunneqartarnissaat pingaaruteqarmat.