Canadami arnat periarfeerussat ilimagisamit amerlanerusinnaasut

Canadami nunap inoqqaavisa arnartaasa periarfeerunneqarsimanngikkunik toqutaasut pillugit allattorsimaffiit tamanut saqqummiunneqassappat? Nuna tamakkerlugu misissuinissamut atatillugu tamanna maanna apeqqutigineqarpoq.
Assi © : Douglas Sprott/Flickr Creative Commons
februaarip 20-at 2016 12:32

Nunap inoqqaavisa arnartaasa periarfeerunneqarsimanngikkunik toqutaasimasut pillugit kisitsisit ilimagisamik allarluinnaasut, misissuinerit maanna aallartereernikuusut takutippaat.

Politiit kisitsisaataannit amerlanerusut paasinarsilluni.

Naggueqatigiit Inuit, indianerit métisilluunniit arnartaasa 1.200-t missaat periarfeerunneqarsimanngikkunik toqutaasimasut politiit kisitsisaataasa maannamut takutikkaluarpaat. Politiilli nunap inoqqaavinik tatigineqarneq ajorput, nunammi inoqqaavi isumaqaramik ajornartorsiutip annertussusaa politiinit isertuunneqartoq.

Kisitsisit ilimagisamik allaanerujussuusut, ajornartorsiullu annertunerujussuusoq, arnat suliniaqatigiiffiisa, nunallu inoqqaavisa suliniaqatigiiffiisa oqaatigiuarnikuuaat.

Nunallu inoqqaavisa arnartaasa periarfeerunneqarsimanngikkunik toqutaasimasut 4.000-it 6.000-illu akornaniittut, nunap inoqqaavi pillugit Canadami ministerip, Carolyn Bennettip, periarfeerussat toqutaasimasullu qanigisaanik ataatsimeeqateqartarnerani paasinarsivoq.

Arnat periarfeerunneqarsimanngikkunik toqutaasimasut pillugit allattorsimaffiit politiit pigigaluarpaat, maannamulli isertuunneqarnikuullutik. Allattorsimaffiilli tamanut saqqummiunneqarnissaat ilaqutaasut qanigisaasullu maanna kissaatigaat, tassami paniusup qatanngutaasulluunniit, nuliarluunniit allattorsimaffimmeeratarsinnaammat, suliniaqatigiiffiit oqarput.

Arnarpassuit allattorsimaffimmut ilanngunneqarsimanngitsut, amerlasuut eqqoriarpaat. Allattorsimaffiilli isertuunneqarmata tamanna takuneqarsinnaanngilaq.

Ilaqutaasulli aqqata tamanut saqqummiunneqannginnissaa ilaqutaasut ilaannit aamma kissaatigineqarpoq.

Taamaattoq maanna neriuutigineqalerpoq arlaatigut aaqqiisoqarumaartoq, misissuinerimmi maanna aallartereerput.