Canadami arnanut annersaasarnermut akerliussutsimik takutitsitsut

Canadap kujasinnerusortaani avannarpasinnerusortaanilu illoqarfinni nunaqarfinnilu arlalinni sapaatit-akunnerata siuliani akerliussutsimik takutitsisoqarpoq.
februaarip 17-at 2014 07:39

Arnat pisinnaatitaaffii - Canadami nunap inuiisa arnartaat pingaarnerutillugit - sammineqarput.

Canada tamakkerlugu arnat periarfeerunneqarsimasut inuartarineqarsimasullu aammalu arnanut annersaasarneq pinngitsaaliillunilu arnerisarnerit amerlavallaarujussuarnerannut akerliussutsimik takutitsisoqarpoq.

Naggueqatigiit inuit indianerillu siuttuisa ajornartorsiut nuna tamakkerlugu misissuiffigeqqullugu Canadami naalakkersuisunut qangali kaammattuutigisarpaat, inuit indianerillu arnartaat 3000-it missaanniittut inuartarineqarsimanngikkunik periarfeerunneqarsimanissaat naatsorsuutigineqarmat. Kisitsisillu suli qaffasinnerunissaat aamma ilimagineqarpoq.

James Anaya, Naalagaaffiit Peqatigiit nunap inuii pillugit immikkut aallartitaat immikkut misissuisoqarnissaanik piumasaqaateqartoqarnera taperserpaa. Taanna Canadamut tikeraarnermi kingorna Canadami naggueqatigiit inuit indianerillu arnartaannik annersaasoqartarnerata taakkuninngalu inuartarinnittoqartarnerata Canadamiut arnartaasa sinnerinut naleqqiullugit arfineq-pingasoriaammik qaffasinnerunerat Canadami naalakkersuisunut nalunaarutigisimavaa.

Taamaammat akerliussutsimik takutitsisut piumasaqaataat paatsuugassaanngilaq. Tusaaneqarusupput ajornartorsiullu amiilaarnaqisoq iliuuseqarfigeqquaat.