Canadami aningaasat nutaat Nunavummi eqqumiitsuliortumit ilusilersorneqarput

Canadami aningaasat pisortatigoortumik naqiterneqartarfiat sananeqartarfiallu oorinik 25-t millioninik Issittumut tunngasunik ilusilersukkanik sapaatip-akunnerup massuma ingerlanerani saqqummersitsissaaq.
Allattoq Marianne Stenbæk, Montreal, Canada, Mads Lynge
novembarip 28-at 2013 05:59

Aningaasat pineqartut affaat, tassa 12,5 millionit, Nunavummi eqqumiitsuliortumit Tim Pitsiulamit, Kinngaanneersumit, ilusilersorneqarsimapput. Aningaasat sinneri aamma 12,5 millionit, Issittumi ilisimasassarsiorluni angalanerit siulliit ilaat assitarivaat, oorillu taakku 25 centinik naleqarlutik, tassa 1 koruuni 25 oorillu missaat.

Arfivik, qilalukkallu qaqortat marluk Tim Pitsiulap ilusilersugaani takuneqarsinnaapput.

Pitsiulak CBC Newsimut oqarpoq arfivik nuannaartoriuarsimallugu, arfeq taanna pillugu ilisimasakinnerput pissutigalugu.

Canadamiut aningaasaataanni Issittoq pillugu aatsaat assitalersuisoqalinngilaq, aningaasarmi 2 dollarinik nalilik, imaluunniit 10 koruunit 37 oorinillu nalilik, nannumik assitaqarmat.

Aningaasaq kuultiusoq, eqqumiitsuliortumit Inukjuarmeersumit Joanassie Nowkawalkimit ilusilersugaq, angakkumik assitaqarpoq, uppimmillu aamma ilaqarluni. Oqaaseq "Canada" inuktitut allattariaaseq atorlugu allassimavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq