Canadami angutit arnanit amerlanerupput
Canadami innuttaasunik siorna kisitsisoqarmat paasinarsisimavoq angutit Northwest Territories-imi Nunavumilu arnanit amerlanerusut.
Canadami innuttaasut ataatsimut isigissagaanni kisitsisit allaagaluarput, tassa arnat angutinit amerlanerummata.
Nunavumi innuttaasut 51 procentii angutaapput arnallu 49 procentiullutik.
Kisitsisinngorlugit tassa angutit 15.105-iullutik arnallu 14.365-iullutik.
Nunavumi innuttaasut Canadap sinneranut sanilliullugu inuusunnerusut innuttaasunik kisitsinerup aamma takutippaa.
Nunavumi innuttaasut agguaqatigiissillugit 23,1-inik ukioqarput, Canadallu sinnerani innuttaasut 39,5-inik ukioqarlutik.
Canadap issittortaani innuttaasut ataatsimut isigissagaanni inuusunnerusartut Canadami naatsorsueqqissaartarfiup kisitsisaataani takuneqarsinnaavoq.
Inuit sisamaagaangata ataaseq 15-it ataallugit ukioqartarpoq, Issittumilu inunngortartut aamma amerlanerusut atuarneqarsinnaavoq.