Canadami aallaasersortoqarnerata kingorna inuit qulit, pasisaq ilanngullugu, toqusut

Canadami British Columbiap illoqarfiisa ilaanni Tumbler Ridgemi marlunngornermi aallaasersortoqarmat inuit qulit toqupput.

Canadami politiit, Royal Canadian Mounted Police (RCMP), taama ilisimatitsisut, Canadami tusagassiorfik CBC allappoq.

Inuit arfinillit atuarfimmi Tumbler Ridge Secondary Schoolimi toqungasut siumorneqarput, ataaserlu napparsimmaviliaanneqarnermini toquvoq.

Inuit marluk najukkami toqungasut aamma siumorneqarput, politiillu oqarneri naapertorlugit taakku aallaasersornermut attuumassuteqarput.

Toqusuttaaq ilagaat pinerliisimasutut pasineqartoq. Taanna atuarfimmi toqungasoq siumorneqarpoq, politiillu naapertorlugit imminut ajoqusernini pissutigalugu toquvoq.

Inuit marluttaaq aqqunartitersimasut napparsimmaviliaanneqartut, allallu 25-t ajoqusersimanertik pissutigalugu illoqarfimmi nakorsiartarfimmi misissorneqartut, politiit oqarput.

Qanorpiaq pisoqarsimanera ilisimaneqanngilaq.

Oqarasuaatikkut kalerrisaarisoqartoq

Sumiiffiup eqqaani najugallit tamarmik politiinit isersimaannaqquneqarlutillu matutik parnaaqqatinnissaannik siusinnerusukkut kaammattorneqarput. Ilinniarnertuunngorniarfimmut ornigutinnginnissaannik aamma peqquneqarput.

Politiilli peqqussutertik kingusinnerusukkut atuukkunnaarsippaat. 

CBC-p nutaarsiassiinera naapertorlugu, politiit marlunngornerup ualiani, sumiiffimmi nalunaaqutaq naapertorlugu nalunaaqutaq 13.20, ilinniarnertuunngorniarfimmukartitaanerat, RCMP-mit oqaatigineqartumit paasinarsivoq.

Sumiiffiup eqqaani najugallit pinerluttumik angalaartoqarneranik oqarasuaatikkut tamatuma kingorna kalerrisaarneqarput.

CBC-p nutaarsiassiinera naapertorlugu, inuk kalerrisaarutigineqartoq arnaassangatinneqarpoq kajortunik nujalik kjolelik.

CBC-p nutaarsiassiinera naapertorlugu, politiit pisortaanerat Ken Floyd, tusagassiortunik katersortitsinermi oqarpoq, pasisaq atuarfimmi toqungasoq nassaarineqarsimasoq taannaasorlu inuk kalerrisaarummi oqaatigineqartoq.

Pasisaq inersimasuunersoq meeraanersorluunniit taassuma oqaatigiumanngilaa. Pinerlineqartut eqqarsaatigalugit tamanna akissuteqarfigiumanagu taanna oqarpoq.

Kisitsisit 2021-meersut naapertorlugit, Tumbler Ridge, illoqarfiup anginerusup Vancouverip avannaata kangiatungaani 660 kilometerit missaanni ungasitsigisumiittoq, 2.400-nik inoqarpoq.

CBC-p nutaarsiassiinera naapertorlugu, ilinniarnertuunngorniarfik Tumbler Ridge Secondary School 160-inik ilinniartoqarpoq. 

/ritzau/