Canadami Aalisarnermut naalakkersuisunngorlaaq isumalluarpoq

Uumasut atugarissaarnissaat eqqarsaatigalugu puisit amiinik eqqussuinerup niuernerullu inerteqqutaalernissaa EU-Kommissionip aasaq juulip ulluisa 23-anni siunnersuutigaa, Canadamili Aalisarnermut naalakkersuisunngorlaap, Gail Shea-p, tamanna ernumanartortaqartinngilaa.
Allattoq Louise M. Kleemann
novembarip 21-at 2008 08:51

Taanna isumalluarpoq, oqarlunilu aappaagu puisinniarnissaq ernummatigisariaqanngitsoq, eqqugaanavianngitsorlu.

Nutaarsiassaqartitsivimmi The Associated Pressimi allaaserisaq naapertorlugu aviisimi Rocky Mountain Telgramimi taama allaaserinnittoqarpoq.

EU-p nioqqutissanik eqqussueqqusinnginnissamut siunnersuutaa nunanut ”naakkittaasuliorluni puisinniartartunut” atuuppoq, Canada tassani qitiutinneqarluni, EU-mimi isumaqartoqarpoq canadamiut naakkittaatsumik puisinniartartut. Nioqqutissanilli eqqussueqqusinnginnissamut siunnersuut Issittumi kalaallit naggueqatitta puisittaannut atuutinngilaq, tamaanimi naggueqatigut isumaqatigiissummi immikkut piumasaqaammik peqarmata.

Canadami puisit 270.000-it 335.000-illu akornanni amerlassusillit ukiut tamaasa pisarineqartarput, puisinniartartut aalisartullu oqarput, nungusaataanngitsumik naakkittartumillu puisinniartarlutik.

Inerteqqut akuersissutigineqassappat siunnersuut nunat 27-t EU-mut ilaasortaasut tamarmik akuersissutigeqqaassavaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq