Canadami 1200 kilometerinik isorartussusilimmik ruujoriliorniarput
Mackenziep Qooruatigut ruujorersualiornissamut nalilersuisussatut ataatsimiititaliap nalunaarusiorniarnera naatsorsuutigisamit ukiunik pingasunik sivisunerusumik ingerlanneqareerluni maanna saqqummiunneqarpoq.
Mackenziep Qooruatigut gassimik ruujorersuakkoortitsinissaq nalunaarusiami ajoriffissaqartinneqanngilaq. Gassi Nordvest Territoriap issittortaaniit, Inuvimmut qanittumiit, naalagaaffiup ilaanut Albertamut ingerlatinneqassaaq. Ruujorersuaq 1200 kilometerit inulaarlugit isorartussuseqassaaq aamma 74 milliardit koruunit missiliorlugit akeqassalluni, tassa naatsorsuutigineqartumit akisunerungaatsiaqaluni.
Pilersaarut tusarniaanerpassuit atorlugit saqqummiunneqartareerpoq, ilaatigut tusarniaavigineqartarlutik suliffissuaqarnermik ingerlataqartut, naggueqatigiit Inuvialuit aamma Dene indianerit naggueqatigiit arlallit. Suliniutit taamaattut angisuut Canadami sivisuumik nalilersorneqaqqaartarput, taamaalilluni avatangiisinut inuiaqatigiinnullu sunniutissai qanoq ittuussanersut nalilersorluarneqarniassammata. Ruujorersuup septembarimi qitiusumik naalakkersuisunit akuersissutigineqannginnerani, assigiinngitsut 176-it misissuiffigineqarnissaat nalunaarusiami innersuussutigineqarpoq.
Nalunaarusiap juullip ukiortaallu akornanni saqqummiunneqarnera pissutigalugu, oqallisigineqarnissaata sapaatip akunnerini tulliuttuni pinissaa naatsorsuutigineqarpoq. Tassami Inuvialuit, Dene indianerit suliffissuaqarnermillu ingerlatallit, ruujorersualiinissap piviusunngortinenqannginnerani, innersuussutigineqartut 176-iusut misissoqqaarusummatigik.