Canada Ualerngup Tarajuani uuliaqarsinnaaneranik misissuilerpoq

Ualerngup Tarajua, nunap immikkoortuata Yukonip avannaaniittoq, paasilluarniarlugu ilisimatusarnissamut Canadap ukiuni tallimani tulliuttuni koruunit 110 millionit atorniarpai.

Senatimut ilaasortap Daniel Langip nunap immikkoortuanit Yukonimeersup sapaatip-akunnerani kingullermi nalunaarutigaa aningaasarpassuit taakkua avatangiisinik inuillu aningaasarsiorsinnaanerannik misissuinerup ilaanut atorneqassasut, CBC News taama nalunaarpoq.

Ilisimatusarnermi siunertarineqartoq tassaavoq nunap ilaani tamaani avatangiisinik inunnillu sulisussanik aqutsinerup pitsaanerulersinneqarnissaa akisussaaffigineqarnerulernissaalu.

Mexicop kangerliumanersuani uuliamik maqisoornerup kinguninnguatigulli imaani qillerinissat pillugit oqallinnerit sakkortuseriarsimapput. The National Energy Board, pisortani oqartussaasut, uuliasiornissamut gassisiornissamullu malittarisassiortuullutillu akuersissuteqartartuusut maannamut malittarisassanik nalilersuillutik aallartipput immaqa maannakkut allannguisoqassanersoq sukannernerulersitsisoqassanersorluunniit paasiniarlugu, taamaalilluni uuliamik gassimilluunniit maangaannartitsinissamut assingusut annikillisarneqassammata.

Senatimut ilaasortaq Lang aamma oqarpoq nutaamik ilisimatusarneq inuit tamaani najugallit isumakuluuteqarnerannut iluaqutaassasoq, aammalu Inuvialuit Ualerngup Tarajuata qanittuani najugallit ilisimatusarnikkut tulleriiaarinernut aalajangeeqataajumaartut.

Nellie Cournoyea, Inuvialunni pisortaq tusaamasaq oqarpoq, oqartussaaqataanissap aammalu uuliasiornermi gassisiornermilu kingunerisassat paasilluarneqarnissaat pisariaqartoq.