Canada: A Taste of the Arctic iluatsilluartoq
A Taste of the Arctic Issittumi misigisassat inuillu nerissasaataannik misiliineq Ottawami ataasinngornermi unnukkut pivoq.
Inuit Tapriit Kanatami Ottawami upernaakkut aaqqissuussisarnerat upernaat tamaasa pisalernikuuvoq.
Ministerit, atorfillit aamma Canadami nunap immikkoortuini naalakkersuisut, naggueqatigiit inuit kattuffiini suliniaqatigiiffiinilu siulittaasut pisortallu katillutik 500-it missaannik amerlatigisut katerisimaarluni unnussiortitsinermi peqataapput.
Unnusiuaartitsilluni katerisimaarnermut peqaaneq inummut ataatsimut 1000 koruuninik akeqarpoq. 500.000 koruunit Inuit Tapiriit Kanatami suliniutigisaanut tapiissutigineqarput.
Aaqqissuussineq A Taste of the Arctic naggueqatigiinnit inunnit qallunaanillu peqataaffigineqartarpoq, taakkua issittumi suliniutinut arlaatigut suliaqartut katerisimaarnikkut imminnut ilisarisimalernerulernissaat siunertarineqarluni.
Torlussuttoqarpoq, naggueqatigiit inuit rockimik nipilersortartut tusarnaartitsipput aamma atuarfimmi Nunavut Sivuniksavutmi atuartut erinarsorput nipilersorlutillu kiisalu puisinniartarneq tapersersorniarlugu "sealfie"-mik taallugu oqarasuaammik angallattakkamik imminnut asiliisoqarpoq.
Inuit kulturiannik saqqummersitsisoqarpoq tusarnaartisisoqarlunilu, kiisalu tuttup neqaanik oqaanngitsunik siatanillu sassaallertoqarpoq aamma kapisilinnik aalisakkanillu allanik mattannillu sassaallertoqarlunittaaq.
Taste of the Arcticimik ukiormanna aaqqissuussineq ukiup siulianut sanilliullugu iluatsilluarneruvoq, tassuuna ersersinneqarpoq Canadami illoqarfiit pingaarnersaanni issittumut soqutigininnerup annertunera.
