Canada Sullualummik piginnittussaarusuppoq

Sakkutuut 100-t missaanniittut Canadap avannaata tungaaniittumut Qurluqtuliartinneqarsimapput. Canadap Sullualummik piginnittussaanera sakkutuut suliassaasa pingaarnersaraat. Qurluqtumiut ilinniartitsisoralugit sikukkut aalisarneq ilinniarneqassaaq, tuttumillu qanoq aattuisoqartarnersoq ilinniarneqassalluni. Qamuteralannik iluarsaassineq ilinniarneqassaaq, apummilu qarajaliorneq illuikkiornerlu ilinniarneqassallutik. Saassusseriaatsit illersueriaatsillu Issittumut naleqqussakkat sakkutuut Qurluqtumiinneranni aamma ilinniarneqassapput. Canadamiut nittartakkatigut nutaarsiassaqartitsiviat CNEWS taama allappoq. Silaannaap kissatsikkiartuinnarnerata kingunerisaanik Issittumi ukiut qulikkaat arlaqanngitsut ingerlanerini sikuerukkiartuinnalissasoq ilisimatuut ilimagaat, Sullualukkoortoqarsinnaalernissaalu ilimagineqarluni. Pisuussutit tamaaniittut annertujaajusinnaammata Canadap Sullualummik piginnittussaanini qulakkeerusuppaa. Nunat arlallit siuttui akerlianik isumaqarput, oqarlutik Sullualuk tassaasoq nunat tamat imartaat, tamanillu ingerlaarfigineqarsinnaasoq.