Canadami sakkutuut sapaatit akunnerata siuliani sapaatit akunnerini pingasuni sivisussusilimmik issittumi sungiusartinneqalerput. Sungiusarneq Nanoq-mik taagorneqarpoq siornatigumullu sanilliullugu amerlanerungaartut peqataatinneqarlutik, tassami sakkutuut 700-it sinneqartut peqataatinneqarput umiarsualerlutik, aqqartartulerlutik timmisartulersorlutillu.
Qeqertaaluup eqqaaniinnerusoq sungiusartitsisoqarpoq aammali Nunakput eqqaani, tassa Canadap avannaarsuata kippasinnerusortaani, kiisalu Nunalivut eqqaani, tassa Canadap avannaarsuani qeqertarpaat akornanni, sungiusartitsisoqarpoq.
Sungiusarneq Canadap avannaarsuani issittumi tamarmi siaruartinneqarpoq taamaasiornikkullu Canadap avannaarsua pillugu iliuusissaq qanittumi aalajangiunneqartoq eqqarsaatigalugu Canadap naammattumik sakkutuuliisinnaanera takutinniarneqarluni. Canadamiut nunamik avannaarsuani oqartussaanertik sungiusartitsinermi aamma takutinniarpaat.
Sungiusarnermi aammattaaq Canadap aqqartartut atorlugit imminut illersorsinnaanini takutinniarpaa. Tamatumani Russit atomisortunik marlunnik aqqartartulerlutik qanittumi Qalasersuarmiinnerat eqqarsaatigineqarpoq.
Sungiusartitsineq Nanok aggustip 28-ata tungaanut ingerlanneqassaaq, Canadamilu ministeriuneq ministerinik allanik peqateqarluni sapaatit akunnerani tullermi Nunavumut tikeraartussaavoq sungiusarneq takusassarsiorfigiartorlugu. Ministeriuneq Harper aqqartartumut ilaalluni Canadamiut issittumi qanoq iliorsinnaanerat paasisassarsiorfigumaaraa ilimagineqarpoq.