Canada Ruslandilu aaqqiagiinnginnerat Tartupalulerngusaannermut pitsaavoq

Ruslandip sakkussiornikkut annertusaaneranut Canadap oqartussaaffini illersorniarpai. Tartupaluk pillugu danskit canadamiullu aaqqiagiinngissuteqarnerat annikinnerusutut isikkoqarpoq.
Allattoq Jaaku Lyberth
aggustip 26-at 2014 09:32

Ruslandip sakkussiornikkut annertusaaneranut Canadap oqartussaaffini illersorniarpai. Canadap nunanut allanut tunngusunut ministeria John Baird, taama aalajangersimatigisumik oqarpoq.

Nunat sinniisuisa ataatsimiinnerannut atatillugu Tartupaluk pillugu Kalaallit Nunaata Canadallu akornanni aaqqiagiinnginneq oqaluuserineqarpoq. Aviisi Berlingske taama allaaserisaqarpoq.

Tartupaluk pillugu danskit canadamiullu aaqqiagiinngissuteqarnerat annikinnerusutut isikkoqarpoq.

Baffinip kangerliumarngani aalisarsinnaanermik uuliasiorsinnaanermillu pisinnaatitaaffiit pillugit Kalaallit Nunaat Canadalu 2012-imi isumaqatigiissuteqarput, Tartupalulli pillugu taamani isumaqatigiittoqarani.

Ministeri isumalluartoq

Aviisimi Berlingskemi allaaserineqartoq naapertorlugu canadamiut nunanut allanut tunngusunut ministeriat isumalluarpoq, Naalakkersuisut siulittaasuannik danskillu nunanut allanut tunngasunut ministeriannik Martin Lidegaardimik Københavnimi ataatsimeeqatigiinnerup kingorna.

- Oqaluuserineqartut tamaasa pillugit ajunngitsumik ullaaq manna oqallippugut, John Baird oqarpoq.

-  Lincoln Seamik isumaqatigiissut kingulleq pillugu sulinitsinni siuariarpugut sulili suliassaqarpugut naammassisassanik. Nunap toqqaviata assiliorneqarnera naammassillugu suliarisussaavarput. Isumaqatigisatsinnik peqatigisatsinnillu suleqateqarnissatsinnik piumassuseqarpugut, Canadap Kalaallit Nunaatalu unammilligassaat taakkua aaqqissinnaanngikkunikkit isumalluarnarpallaanngilaq, Canadami nunanut allanut tunngasunut ministeri oqarpoq.

Tartupaluk avillugu pigineqarsinnaavoq

Aaqqiissutissatut siunnersuutigineqartunut ilaavoq, Tartupaluk Kalaallit Nunaata Canadallu avillugu pigilersinnaagaat.  

Ataatsimiinnermi oqallisigineqarput EU-mut puisit amiinik eqqusseqqusinnginneq Issitumilu Siunnersuisoqatigiinni sulineq.