Canada: Puisit amii pillugit suliniuteqartoqassaaq

Puisit amiinit tunisassianik EU-mut eqqusseqqusiunnaarnissamik siunnersuut imaassinnaavoq aatsaat ukiut marluk qaangiuppata akuersissutigineqartoq. Canadap aalisarneq pillugu EU-mut aallartitaa Loyola Sullivan CBC Newsimut taama oqarpoq.
Allattoq Elisa Isaksen
juulip 29-at 2008 08:25

Ukiut taakku marluk Canadap atorluarniarsariniarpai, isumaqatissarsiornikkut siunnersuutip akuersaarneqannginnissaa sulissutiginiarneqarmat.

Naggueqatigiit Inuit Nunavummiittut, kiisalu Newfoundlandimi Labradorimilu puisinniartartut siornatigut oqaatigereerpaat puisit pissusissamisoortumik toqunneqartartut, nungusaataanngitsumillu piniarneqartartut.

Puisinniartarnerup naggueqatigiinnut Inunnut pingaaruteqassusaa EU-mut nunarsuarmioqatigiinnullu erseqqissarneqareersoq aamma oqaatigineqarpoq:

- Innuttaasummi illersorneqarnissaat Canadap naalagaaffittut pisussaaffigaa, soorlu ulluinnarni piniarnermik inuuniuteqartut illersussallugit pisussaaffeqartoq, Loyola Sullivan oqarpoq, nangillunilu:

- Puisinniartarneq pillugu eqqunngitsunik sunniiniarlunilu paasissutissiisarnerit imaaginnavipput, Suliniaqatigiiffiit arlallit paasissutissanik eqqunngitsunik siammarterisarmata, Canadap aalisarneq pillugu EU-mut aallartitaa oqarpoq.