Canada nunanit tamalaanit alaatsinaanneqartoq
CBC News naapertorlugu suliniaqatigiiffiup aappaa tassaavoq FN-ip nunap inuiisa pisinnaatitaaffiinik immikkut alaatsinaatitasoq, tikeraartussallu aappaat tassaavoq FN-ip arnanik immikkoortitsisarneq akiorniarlugu ataatsimiititaliaani ilaasortat.
Inuit pisinnaatitaaffii pillugit suliniaqatigiiffiit Canadami ajornartorsiutaasut marluk misissorniarpaat. Ajornartorsiutit misissorniagassaasa aappaat tassaavoq indianerit reservatiini Inuillu nunaqarfiini ineqarnikkut pissutsit ajorluinnartut. Nunap inuii amerlasuut, Inuit ilanngullugit, angerlarsimaffinnik peqqinnartunik imermik eqqiluitsumik pissarsiffigisinnaasaminnik amigaateqarput aammalu pitsaasumik naammaginartumillu ilinniarsinnaatitaanatik.
Arnanik immikkoortitsineq akiorniarlugu ataatsimiititaliap misissuiffiginiagaa tassaavoq, ukiuni qulini kingullerni nunap inuiisa arnartaasa toqunneqarsimasorineqarlutik periarfeerunneqartarnerat. Kisitsisit nikerartupilussuupput, arnalli 3000 - 6000-illu akornanniittut periarfeerussimanissaat naatsorsuutigineqarpoq.
Canadami politiit oqartussaallu ajornartorsiummik pimoorussinnginnerarlugit nunap inuiisa oqaaseqartartui arlaleriarlutik uparuaasarsimapput.
Deepak Obhrai Canadami nunanut allanut ministeriaqarfimmeersoq CBC Newsimut oqarpoq Canada isertugaqanngitsoq, nunamilu inuit pisinnaatitaaffii tulluusimaarutigineqartut.
Indianerilli høvdingiat Harper, FN-imut ikioqqusimasut ilaat oqarpoq, Canadami inatsisartunut arlaleriaqalutik ikioqqusimagaluarlutik kinguneqanngitsumilli, taamaattumillu maanna avataanit ikiorneqartariaqarlutik.
