Canada nunani issittuni assigiinngitsunik nutaanik suliniuteqarpoq

Canadami naalakkersuisut nunani issittuni Canadap piginnittuunerata aalajangersarnissaa ilungersuutigisorujussuuaat. Tamatumunngalu pissutissarpassuaqarpoq, USA isumaqarmat sinerissanut Canadap pigineragaanut pisinnaatitaaffeqarluni, Ruslandilu Qalasersuarmut tamatumalu eqqaani sinerissanut qanippallaalersutut isumaqarfigineqarluni Danmarkilu Tartupalummut soqutiginnilluni. Tamanna siornatigut eqqarsaataannaagaluarpoq, maannakkulli silap allanngoriartornera pissusiviusunik nutaanik pilersitsivoq, Sullualuk ingerlaffigineqarsinnaalerpoq, nunarsuup uuliamik gassimillu pisuussutaasa iluaqutiniarneqanngitsut ilarujussui tamaaniipput maannalu tamakkua tassa tikinneqarsinnaalerlutik. Nunat assigiinngitsut tamarmik taakkunannga pissarserusupput.

Taamaattumik Canadap nunat issittut illersornialerpai. Canadap iliuusissatut pilersaarutaanut atatillugu statsminister Stephen Harper ministerini ilagalugit Nunavumut, Yukonimut Northwest Territoriamullu ulluni tallimani 17. augustimiit 21. augustimullu angalaarniarpoq. Tamanna aallartitatigut suliniuteqarneruvoq takutinniarlugu tamanna Canadap ilagigaa pingaarutilik. Allaat naalakkersuisut Iqalunni ataatsimiissapput. Naalakkersuisut tamatumunnga peqatigitillugu iluaqutissanik suliniuteqarput. Sikunik aserorterussuaq nutaaq 3½ mia. kr.-inik akilik sananeqassaaq kiisalu umiarsuit alapernaarsuutit mikisut ukiup sikuatigut ingerlasinnaasut nunanillu issittunik alapernaarsuisussat sananeqassallutik. Tamatuma saniatigut nunani issittuni umiarsuarsualivik umiarsualiviilluunniit sananeqassapput, tamannalu statsministerip angalanermini tusagassiarissagaa naatsorsuutigineqarluni. Statsministerip oqarneratut, nunap immikkoortui tamakkua atunngikkutsik annaasussaavavut.