Canada-mi nunap inuii nagguteqatigiillu Inuit isumalluartut
Canada-mi naalakkersuinikkut siuttut ukiut tamaasa ataatsimiittarput, Canadami naalakkersuinikkut sulinermi pingaaruteqartut tulleriaarnissaat pillugit taamatullu qanoq suleqatigiittoqarsinnaanera pillugu.
Canada-mi ministeriunerup ataatsimeeqatigai Canada-mi nunat naalagaaffiini siulittaasut qulit nunallu immikkoortuini aqutsisut pingasut. Ataatsimiinnermi maannakkut ingerlanneqartumi nunap inuiisa siulittaasui qaaqquneqarput.
Silap pissusaata allanngoriartornera aningaasarsiornikkut ineriartorneq aammalu nunap inuii taakkualu ajornartorsiutaat pingaarnertut ministeriunerup Stephen Harperip saqqummiunniarlugit oqarsimavoq.
Inuit Taperiit Kanatami præsidentiata Mary Simon-ip naggueqatigiit inuit sinnerlugit sisamanngorpat ataatsimiinnermi peqataassaaq.
Ministeriunermit Stephen Harperimit pingaarnerutillugit saqqummiunniarneqartut pingasut naggueqatigiinnit inunnit pingaartinneqartut Mary Simon oqarsimavoq.
Tulleriaarisoqarnerani aningaasarsiornikkut ineriartortitsinissaq naggueqatigiinnit inunnit pingaarnertut isigineqarpoq, ilinniartitaanerit aallartinniarneqartut ingerlanneqarnissaannut attuumassuteqarmata, Canada-mi ilanngutassiortoq Marianne Stenbæk ilanngutassiami taamatut oqarpoq. Ilinniartitaanerit pisariaqartinneqartut ajunnginnerusullu ilinniarneqanngippata aningaasarsiornikkut ineriartortitsinermi naggueqatigiit inuit tamakkiisumik peqataasinnaanngillat, tamatta tamanna akisussaaffigivarput Mary Simon oqarpoq. Silap pissusaata allanngoriartornera Canadap issittortaani takuneqarsinnaallunilu malugineqarsinnaavoq, taamaattumillu naggueqatigiit Inuit oqallinnermi isummersuutinik saqqummiussaqarluarsinnaapput, Mary Simon oqarpoq. Ataatsimiinnermut pingaaruteqartumut naggueqatigiit Inuit qaaqquneqarmata Mary Simon-ip nuannaarutigaa . Naggueqatigiit Inuit taamatullu nunap inuii allat suleqatigiinnissaannik neriorsuut ministeriunerup Stephen Harperip neriorsuutigisimasaa piviusunngormat Mary Simon-ip nuannaarutigaa.
