Canada issittumut nutaamik politikkitaartoq

Canada issittoq pillugu nutaamik politikkeqalernissani ukiut sisamat matuma siorna neriorsuutigimmagu.

CBC taama allaaserisaqarpoq.

Nalunaarusiaq "Canada's Arctic and Northern Policy Framework"-imik taaguuteqarpoq. Taannalu Issittumi 2030-p tungaanut ineriartornermut politikki nutaaq tunngaviussasoq ministerip, Carolyn Bennettip oqaatigaa, tassani nunap inoqqaavi Inuit, Indianerit Métissillu qanimut suleqatigineqarnissaat naatsorsuutigineqarluni.

Inuit Nunangani naggueqatigiit inuit namminiilivinnissamik kissaateqarnerat tapersersorneqassasoq politikkimmi aallarniummi atuarneqarsinnaavoq. Inuillu pisinnaatitaaffii politikkimut ilanngunneqassasut, ministerip Carolyn Bennettip oqaatigaa.

Mary Simon nalunaarusiortoqarneranut sunniuteqartoq

Politikki nutaaq naggueqatigiit inuit siuttuata, Mary Simonsip ministerimut nalunaarusiaanit ilaatigut aallaaveqarpoq. Mary Simonsip 2016-imini inuit siuttui suliniaqatigiiffiillu assigiinngitsut isumasioqatigai, isumasioqatigiinnermi issittumut politikkitaassamut suut piumasarineqarnersut tusarniarneqarluni.

Ilaqutariit peqqissut, inuiaqatugiit aningaasaqarnikkut siuariartortut silallu pissusiata allanngoriartorneranut unammilligassat nalunaarusiami sammineqarput.

Issittorli pillugu politikki nutaaq erseqqissunik assersuusiorsimannginnerarlugu isornartorsiorneqalereerpoq.

Aningaasaqarneq pillugu pilersaarutinik ineriartortitsinissamut suli suliassaqarujussuartoq Iqaluit borgmesteriata Madeleine Redformip nutaarsiassaqartitsivimmut CBC-mut oqaatigaa. Nuannaarutigaali najugaqavissut taakkulu siuttui peqataatinneqarmata, naak qangali pilersaarutaareeraluartoq.