Canada issittumi piumasaqarniarpoq

Russit Sikuijuitsup Avannarliup imartaata naqqani erfalasuminnik nappaareersullu, Canadap ministeriunera, Stephen Harper, nunani issittuni angalavoq takutinniarlugu nunagisamik avannaarsuani issitumi killeqarfimminnut piumasaqaatitik suunersut.

Canadamiut ministeriunerat Canadami sakkutuunik ingiallorteqarluni ulluni aggersuni angalaassaaq, ”Nunani issittuni naalagaaffiup allamut atanani namminersortuunera nittarsaanniarlugu” angalanissaat Qeqertaaluup sineriaata avataani ingerlanneqassaaq.

- Canadamiut tamarmik akuerisariaqarpaat, Issittoq aningaasarpassuarnik, avatangiisinik allatigullu sorpaasuanik imaqarmata, siunissami Canadamut pingaarutilerujussuanngortussanik, ministeriuneq Stephen Harper, angalanini aallartillugu Fort Simpsonimut Nordvestterritoriamut ”Inuvialuit”-niitilluni oqarpoq.

Ministeriunerlu ilungersorluni neriorsuivoq, Canadap issittumi namminersortuunera illersorniarlugu

nunat tamat soqutiginninnerat Canadap immikkoortuinut alliartuinniartillugu. Sapaatip-akunnerata matuma siuninnguatigut ministeriuneq Harper peqqusivoq Issittoq eqqarsaatigalugu, sakkutuut amerlineqassasut siunissamilu aqqartartut tikittarfissaannik, issittup imartaani nakkutilliissutissat arfinillit – arfineq-pingasut inissaannik sanasoqassasoq.