Canada issittumi aallartitaqaqqilissaaq
Qalasersuup nalaani inuunermut tunngassuteqartut, Sikuiuitsoq Kujalliullu nalaani tunngassuteqartut aallartitaqarfiup isumagisassarai.
Aallartitaqartitsisarneq Canadap 2006-imili uninngatissimavaa, maannali piviusunngortinniarneqalerluni:
Nunarsuatta issittortaanut tunngassuteqartunut suliaqartussamik aallartitaqarnissaq, Canadap 1994-imi aallarnerpaa. Atorfinitsitsisoqarpoq, aallartitalli marluk atorfeqareersullu sipaarniuteqarneq pissutaalluni aallartitaqartitsisarneq 2006-imi unitsinneqarpoq.
Taamanikkunniilli pisorpassuaqarpoq. Issittoq nunanit allanit soqutigineqaleraluttuinnarpoq, unammilligassallu amerlapput.
Canadap issittortaa soqutigineqaleraluttuinnarmat aallartitamik atorfinitsitsinissaq siunniunneqarpoq. Canadap Issittumut tunngassuteqartunut pilersaarutai iliuusissaalu aallartitap pingaarnertut suliassarissavai, pilersaarutit piviusunngortinneqarnissaat isumagineqassalluni.