Canada illersornissarlu

Amerikap avannarliup illersornissaanut upalungaarsimanerulernissamik, issittup imartai ilanngullugit, Canadami naalakkersuisunngorlaat U.S.A-mut isumaqatigiissuteqarnialerput.

Naatsorsuutigineqarporlu maajimi atsioqatigiittoqassasoq.

Illersornissamut isumaqatigiissutissaq amerikap avannarliup imartaasa nakkutigineqarnerulernissaannik imaqassaaq.

Imaanngilarli amerikamiut sorsuutaat Canadap imartaatigoortalissasut, siunertarineqarporli paasissutissanik paarlaateqatigiittarnissaq.

Canadap illersornissamut ministerertaavata Gordon O´Connorip, konservativiusup, imaanit saassunneqarnissaminnut sillimasariaqarnertik pisariaqarnerarpaa.

Paasissutissat NORAD-ip qullersaqarfianut Colorado Springsimiittumi canadamiut amerikamiullu sakkutuuinit misissoqqissaarneqartassapput. O´Connorilli amerikamiut radariisa, qaartartunullu igeriuttakkanut illersornissamut pilersaarutaasa annertusinissaannut tapersersuinerussannginnerarpaa.

-“U.S.A-p naalakkersuisuisa tamassumunnga peqatiserippatigut inatsisartutsinni oqaluuseriumaarparput” Gordon O´Connor tusagassiortunut katersortitsinermini nassuiaavoq.