Canada Danmarkilu issittumi angallannissaq pillugu suleqatigilerput
Isumannaallisaanikkut politikkip saniatigut aammattaaq iluanaarniutigalugu ilisimatusarnermullu tunngasumik, soorlu umiarsuit takornariartaatit atorlugit issittup imartaani angallanneq annertusiartormat, Kalaallit Nunaanni sakkutooqarfiup Canadamilu taamaangajattumik oqartussaasut nassuerutigaat, nunani issittuni suleqatigiinneq suli ineriartortinneqartariaqartoq, taamaattumillu nunat issittut akornanni sungiusarnerit amerlanerusut ilimagisariaqartut, Kalaallit Nunaannut tunngatillugu ilaatigut tassaasut timmisartut, umiarsuit qimussimillu alapernaarsuisut Sirius.
Sapaatip akunnerani kingullermi suleqatigiinneq aallartinneqarpoq, timmisartoq Challenger aatsaavissuaq Canadap avannaata inuilaartaani ungasissuni avinngarusimasunilu mittarfinnut sioraasunut angalaartinneqarmat.
Timmisartoq siullermik nunarsuarmi ilisimatuutut sulliviit avannarpasinnersaanni, Qalasersuarmiit taamaallaat 1000 km-inik ungasissusilimmi Eurekamiippoq. Tamatumunnga tulliutillugu angalaneq Qaussuittumut, imaluunniit Resolute Bayimut, Sullualuup avannarpasinnerusortaaniittumut ingerlaqqissaaq.
Timmisartup ulluni qaninnerpaani sila ajussanngippat suliamut atasumik Alertimut Nanisivimmullu angalassaaq. Canadami mittarfimmut avinngarusimasunut angalanerni mittarfiit sioraasut timmisartumik Challengerimik siunissami sullissinissanut naleqquttuunersut naliliivigineqarnissaat siunertarineqarpoq.
