Canada Clintonimit isorineqarpoq

Hilary Clinton isumaqarpoq nunat tallimat Qalasersuarmut sineriallit nunanut allanut ministeriisa Canadami ippassaq ataatsimiinneranni, Sverige, Finland aamma Island ilanngullugit ataatsimiigiaqquneqarsimasariaqaraluartut. Canadap nunanut allanut ministeriata Lawrence Cannonip nunanut allanut ministereqatini, nunanit Qalasersuarmut sinerialinneersut tallimat kisiisa, ataatsimiinnermut nalunaaquttap akunnerinik pingasunik sivisussusulimmut qaaqqusimavai.

Taamatut killiliilluni qaaqqusineq Sverigimit, Finlandimit aamma Islandimit, nunat Qalasersuarmut sineriallit tallimat peqatigalugit Issittumi Siunnersuisoqatigiinnut ilaasortaasut, nuannaarutiginngeqaat. Tassami Issittumi pissutsit Siunnersuisoqatigiinni oqaluuserineqartarmata.

- Issittumut tunngasunik pingaarutilinnik oqallinnermi nunat inatsisitigut illersukkamik tamaani pissutsinik soqutigisallit ilaasariaqaraluarput, Hillary Clinton ataatsimiinnissaq sioqqulllugu taama oqarpoq.

Taamatut isornartorsiuineq Canadap nunanut allanut ministerianit akueriumaneqanngilaq.

- Issittumi Siunnersuisoqatigiit taarserneqarnissaat imaluunniit qajannarnerulersinneqarnissaat ataatsimeeqatigiinnermi siunertarineqanngilaq, Cannon oqarpoq.

Aamma Danmarkimi inatsisinik atortitsinermut ministerip Lars Barfoedip ataatsimiinneq "pitsaasutut kinguneqarluartutullu" taavaa.

- Issittumi Siunnersuisoqatigiinni, ukiormanna Danmarkip siulittaasuuffigisaani, suleqatigiinnerup nukittorsarneqarnissaa isumaqatigiissutigaarput. Aamma suleqatigiinnerup qanoq nukittorsarneqarnissaa aamma nunat siunnersuisoqatigiinni alaatsinaattutut peqataasinnaanerannut tunngasunik siunnersuusiornissarput neriorsuutigaara, ataatsimiinnerup kingornagut Lars Barfoed Ritzauimut oqarpoq.