Canada akuerseqataanngitsunut ilaavoq

FN-imi nunat inoqqaavisa pisinnaatitaaffii pillugit isumaqatigiissusiaq ippassaq taasissutigineqarmat nunat sisamat akuersinngillat, taakkununnga ilaalluni Canada.

Nunap inoqqaavisa Canadami naalakkersuisut naaggaarnerat iluarinngilaat. Canadamiut isumaqatigiissusiassaq ukiorpassuarni iluarisimaaraluarpaat, konservativelli partiiat ukiup aappaata affaata matuma siorna naalakkersuisunngormata Canadamiut isumaat allanngorpoq. Isumaqatigiissusiap taasissutigineqarnissaata ukiumik ataatsimik kinguartinneqarneranut isummaminnik allanngortitsinerat peqqutigineqartunut ilaagaluarpoq. Canadami naalakkersuisut oqaaseqartittagaat ippassaq oqarpoq isumaqatigiissusiap imaa ilaatigut marloqiusamik paasisariaqartoq, Canadamilu nunap inoqqaavi inatsisitigut illersorluarneqarsinnaasut, nangillunilu oqarluni paragraffit ilaat aamma Canadami inatsisinut atuuttunut akerliusut.

Oqaaseqartartup oqaatigaattaaq nunamik piginnittussaaneq pillugu isumaqatigiissutigeriikkat aallaqqaataaniit aallartinissaat naalakkersuisut pinngitsoorusukkaat. Indianerilli høvdingiisa qullersaat, Phil Fontaine, naqissusiilluni oqarpoq nunap inoqqaavi Canadami naalakkersuisut isumaat allanngorteqqinniarlugu ilungersortuassasut.

Nunat inoqqaavisa kattuffiisa Canadap naaggaarsimanera ullumi avoqqaaraat.