Campus Kujalleq: Ilinniartut ilisimasakippallaarput

Telemi pisortap, Michael Binzerip, meeqqat atuarfiata aaqqissuussaanera sapaatip akunnerata siuliani isornartorsiutigereeraalu, tamanna oqallisaalerpoq. Kujataani GU maanna aamma meeqqat atuarfiannik isornartorsiuisunut ilannguppoq.
aggustip 21-at 2014 04:20

Campus Kujalliup nalunaarutigaa ilinniartut meeqqat atuarfianninngaanniit naammassigaangamik ilinniakkat tungaatigut ilisimasakippallaartartut.

- Ajuusaarutigaara matematikkimi nalinginnaasumik ilinniartitsisariaqartaratta, naak qaffasissuusussaagaluartoq. Aamma maluginiarpara ilinniartutta qallunaatut oqaatsit ajornartorsiutigisaraat, atuffarluttarlutillu, Kujataani GU-mi pisortaaneq Jan Hansen oqarpoq, nangillunilu:

- Ullutsinni ilinnialersut ukiut 10-20-t matuma siornamut sanilliullugu amerleriarujussuarnikuupput. Tamatuma malitsigisimasinnaavaa ilinniartut ilinniakkatigut pisinnaasaasa annikillinerat. Meeqqat atuarfiata aaqqissuussaanera allanngormalli annertusisamik nalinginnaasumillu ilinniartitsisarnerit atorunnaarnerisa kingorna, Kujataani GU-mi pisortaaneq Jan Hansen, KNR-imut taama oqarpoq.

AAMMA ATUARUK Nick Nielsen: Binzerip isornartorsiuinera tunngavissaqanngilaq

Ilinniartitaanermut naalakkersuisoq, Nick Nielsen, Michael Binzerip isornartorsiuinera isumaqatigaa, meeqqat atuarfiisa aaqqissuussaanerat pitsanngorsarneqarsinnaasoq. Namminersorlutik Oqartussat, Kanukoka ilinniartisisullu kattuffiat Imak suleqatigalugit, immikkoortortaqarfiup suut aaqqinniarneqarsinnaaneri misissorlugit aallartissimavaat.

Nalersuisoqassaaq
- Isumaqatigiippugut meeqqat atuarfiat nalilersorneqassasoq, assersuutigalugu aaqqissuussaq "Atuarfitsialak", aaqqissuunnerlutaava imaluunniit kommuninuku assigiinngitsut atuarfinnik aqutsinerat naammaginanngittoq? Imaassinnaavoq "Atuarfitsialak" allanngortikkipput, allamillu taarserlugu. Suunuku aaqqitassaasut, sukutsitaatigut pikkoriffeqarpugut sanngiiffeqarlutalu.

AAMMA ATUARUK Atuarfitsialammi atuartut kalaallisut angusaat pitsaanngillat

Nick Nielsen taama oqarpoq, erseqqissaatigalugulu inernerit illoqarfimmit illoqarfimmut assigiinneq-ajortut, taamaammat ikioqatigiilluni assigiimmik aaqqeeqatigiinnissaq pisariaqartoq:
 
- Isumaqarpunga ingerlalluartut isiginiartariaqarigut, tamakkulu aallaavigalugit isumassarsiat ingerlalluanngitsunut atorlugit.
 
Nalilersukkap ukiarmanna naammassineqarnissaa naatsorsuutigineqarpoq.