Camp Centuryip radarinik misissuiffigineqarnera GEUS-ip saqqummiukkaa

GEUS-ip Amerikamiut sakkutooqarfigisimasaanni Camp Centurymi 2017-imi misissuinini saqqummiuppaa.

Camp Century tassaavoq Amerikap Sermersuup iluani sakkutooqarfigisimasaa 1967-imi qimanneqartoq, taassuma silap kissatsikkiartornera ilutigalugu Sermersuup ataaniiginnarnissaa allanngoratarsinnaasoq, GEUS-ip nittartakkamini allaaseraa.

Danskit naalagaaffiat naalakkersuisoqarfillu suleqatigiillutik 2017-imi aalajangerpaa sakkutooqarfiusimasoq GEUS-imit misissorneqassasoq.

Misissuinermi ilaatigut silap apullu allanngoriartornera radarikkut nakkutigineqarpoq. Sakkutooqarfiusimasorlu siunissami qanoq isikkoqalernissaa ilaatigut radarikkut qarasaasiakkullu malinnaavigineqarpoq.

Sakkutooqarfiusimasumilu misissuinermi paasissutissat 80-it sinneqartut 2017-imi aasakkut katersorneqarsimasut maanna saqqummiunneqarput.

Paasissutissat taakku tunngavigalugit Camp Century Sermersuup iluaniittoq nunap assingani sumi inissisimanersoq qanorlu ititigisumiinnersoq paasineqarsinnaasimavoq. Naatsorsorneqarnerali naapertorlugu sakkutooqarfik kilometerimik ataatsimik ititigisumi inissisimavoq.
-  Sakkutooqarfimmit sullorsuup tungaanut 45-55 meterisut ititigisoq takusinnaavarput. Nunallu assinga qiviassagutsigu taakku sullorsuit sumiinneri eqqortumik nalunaarsoqqapput, GEUS-imi ilisimatusartoq Nanna Karlsson suliami ilisimannilluartoq oqarpoq.

Misissuinermittaaq takuneqarsinnaavoq Sermersuup iluani ilaatigut imermik peqqumaateqarfik, eqqakkat aqqutaat atomimillu nukissiorfimmit imikoq qimaannarneqarsimasut. 

Atomimik nukissiorfimmik imikoq sakkutooqarfikumiittoq ulorianartorsiortitsinngitsoq GEUS-p oqaatigaa.

Misissuinermi paasineqarpoq glykoleqarfimmi kulbrintimik imerpalasumik 130 meterisut ititigisumi peqartoq. Glykoli kissattoornaveersaataavoq qerisinnaanngitsoq, taamaammat suli imerpalatitsilluni.

Sakkutooqarfiusimasup nikissimanera misissuinermi aamma takuneqarsinnaavoq.

- Sermersuaq ukiut ingelanerini nikittarpoq, taassumalu kinguneraa sakkutooqarfiusimasup Camp Centuryip 1959-imi pilersinneqarneraniilli ullumikkut 232 meterinik nikissimanera, Nanna Karlsson oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat