Professori: Camp Century pillugu nalunaarusiaq aningaasanik asuli atuineruvoq
Camp Centurymi atomip nukinganit misileraanermik qaartitsinermit radiop qinngornerinik navianartumik pilersitsisoqarsimanngitsoq, DTU-mit nalunaarusiami nutaami inerniliissutaavoq.
Tamannali nutaanik misisisuisoqartinnagu nutaamillu ilisimatusartoqartinnagu Niels Bohr Instituttimi ilisimatuut oqaluttuarisinnaagaluarpaat.
- Camp Centurymi pissutsit pillugit GEUS-imut DTU-mullu apeqquteqarnissaq ajunngilaq. Suliffeqarfiit takku ilisimasaminnik saqqummiussisariaqaraluarput. Ilisimasat piviusut suliffeqarfiit marluk nassaassaasutut ilisimasassaat atorneqannginnerat isumaluummissutigaara. Taaamaammat nalunaarusiaq nutaaq danskit kalaallillu aningaasaataannik asuli atuiffiuvoq, Jørgen Peder Steffensen oqarpoq.
AAMMA ATUARUK Atomimik nukissiorfikumi ulorianartumik qinngualasoqanngilaq
Siku pillugu allanik paasissutissaqannginnerarlugu nalunaarummi allassimasoq Jørgen Peder Steffensenip kamaammissutigineruaa.
- Sulerisorineqartugununa, 1964-imiilli Camp Centurymi suliaqartarpugut.
DTU-mit nalunaarusiami Jørgen Peder Steffensenip innersuussutigisaani GEUS-imit ilisimatuut USA-p atomimik nukissiorfiata 1960-imiit 1964-imut atorneqarnerani qinngornernik ulorianartunik silaannarmut sikumullu mingutsitsisoqarnersoq paasiniarlugu assigiinngitsunik sikumi misissuisarsimapput.
Qinngornerilli annikingaaramik pinngortitamut, uumasunut inunnullu naviananngillat.
AAMMA ATUARUK Ataatsimiititaliaq Camp Century pillugu paasissutissanik amerlanerusunik ujartuisoq
Camp Centuryli tassaniittoqarneratalu kinguneri pillugit suli erseqqissaasoqarnissaa pisariaqartinneqartoq Jørgen Peder Steffensenip paasisinnaalluarlugu erseqqissaatigaa, aningaasalli pitsaanerusumik atorneqarsinnaasorai. Taanna naapertorlugu eqqagassat tassaasut akoorutissat, pcb dieselillu sumiiffimmi ullumikkut ajornartorsiutaanerpaapput.
Nalunaarusiami inerniliinermut atatillugu Jørgen Peder Steffensen isumaqataalluinnarpoq.
Professori, Svend Poul Nielsen DTU-p nalunaarusiaanik suliaqaqataavoq. Taassuma isornartorsiuineq paasiuminaatsippaa.
- 1960-ikkunnit sikumi qinngornernik misissuisoqarnikuuneranik tusagaqarnikuunngilanga, Svend Poul Nielsen oqarpoq.
Ilisimatusartut nalunaarusiami nutaami Niels Bohrimik taakkulu paasissutissaataannik ilanngussisimannginnerat Niels Bohr Instituttip silap pissusianik ukkataqarluni misissuisimaneranik DTU-llu qinngornernik ukkataqarneranik tunngaveqarnerarpaa.
USA-p sakkutuuisa Sermersuup ataani isertortumik sakkutooqarfigisimasaat pillugu videoliaq isertuunneqarsimasoq takuuk: