Cameron nassueruteqarluni paasissutissat saqqummiuppai

Cameronip ataataata piginneqatigiiffiutaanit Panamami allattorsimaffeqartut erniaanik Cameron iluanaaruteqartarsimanera sapaatip akunnerani kingullermi paasineqarmat David Cameron ilungersunartumik inissisimalerpoq.

Maanna isornartorsiusoqareermat Cameron iluarsiiniarsarilerpoq.

- Akileraarutinut namineerluni nalunaarsukkat ukiut kingulliit arlaqartut nalunaarsorsimasakka tamanut saqqummiunniarpakka, taakkua pillugit ammasumik piniarpunga, Cameron Tuluit Nunaanni konservatiivit partiianni ataatsimeersuartoqarnerani taama nalunaaruteqarpoq.

Akileraarutit pillugit Cameron sivisuumik oqaaseqarniarsimannginera isornartorsiorneqarpoq tamannalu nassuerutigaa.

 - Nalunngilara pineqartoq pillugu ajunngerinnersumik  iliuuseqarfigisinnaagaluarlugu kukkussutigisakka ilinniarfigissavakka, tuluit ministeriunerat David Cameron taama oqarpoq.

Tuluit nunaanni aviisip The Sunday Timesip Panamami pappilissanik isertuussanik taasanut attuumassuteqartut atit 37.000-it saqqummiussimavai.

Atit pineqartut nittartakkamut isissutissaqartut kisimik takusinnaavaat.