Cameron Afghanistanimut tikeraarpoq

Afghanistanimi sorsunnermut aningaasat amerlanerusut Cameronip neriorsuutigai, Tuluit Nunaannili sorsunneq nuannarineerukkaluttuinnarluni. Sorsunneq aammattaaq partiini naalakkersuisoqatit De Liberale Demokratit nuannarinngivippaat.

David Cameronip ministeriunertut Afghanistan nunatut siullertut tikeraarmagu tamanna nalaatsornerinnaanngilaq. Tuluit 10.000-inik sakkutooqarlutik innuttaasut amerlassusiat eqqarsaatigalugu Afghanistanimi sakkutooqarnerpaapput. Sorsunnermullu nuannarineerukkaluttuinnartumut aaqqiissutissaq naalakkersuisuni nutaani pingaaruteqarluinnarluni.

- Ministeriunertut akisussaaffimma pingaarnersaraat sakkutuut sapinngisamik pitsaasunik sakkoqartinnissaat taamaattumillu Afghanistanimi qaartartut aqquserngup sinaanut inissinneqartartut akiorniarnissaannut 600 mio. kr.-it missaannik aningaasaliissuteqarsinnaagama nuannaarutigalugu, David Cameron oqarpoq, tamatumunngali peqatigitillugu Hamid Karzai-imit Kabulimilu naalakkersuisunit naalakkersuisutigoortumik annertunerusumik suliniuteqarnissaq piumasaqaatigalugu.

Afghanistanimi naalakkersuisut naammattumik iliuuseqanngitsutut tulunnit isumaqarfigineqarput, NATO-lli tungaaniit siuariaateqartoqarnissaa takorusunneqarluni.

Tamanna sakkutooqatigiinnermut pingaaruteqarluinnarpoq, maanna tassa sorsunnermi tassani ajugaasinnaalluta takutissinnaalerparput, akeqqanut, Afghanistanimi innuttaasunut kiisalu nunatsinni angerlarsimasunut, David Cameron oqarpoq.

Tuluit Nunaannili akiuunneq sakkortulluinnarsinnaavoq. Tuluit 70 procentiisa isumasiuinermi sakkutuut angerlartinneqarnissaat oqaatigaat, Nick Cleggillu partiiata De Liberale Demokratit Irakimi sorsunnermut akerliusut suli ukiuni arlalinni Afghanistanimiissinnaannissaq nuannarineqanngivilluni.

- Kikkulluunniit ulloq ataaseq Afghanistanimiinnissartik kissaatiginngilaat, Afghanistanimiut, sakkutooqatigiit nunatsinniittulluunniit. Afghanistanimi naalakkersuisunit inatsisit iluamik maleruarneqarnissaat nakkutigiinnassavarput, Cameron oqarpoq.

Tuluit sakkutuui 294-it Afghanistanimi sorsunnermi manna tikillugu toqutaapput, DR ilanngutassiivoq.