Cambodiami toqoraanersuarnut atatillugu eqqartuussisoqalerpoq
Sorsuuttoqarnerata nalaani pinerluuteqarsimasunik eqqartuussinissaq ukiorpaalussuarni kinguarteqattaarneqareerluni aallartimmat, inuit 500-t tusarnaarput. Akissaaleqineq, allaffissornerujussuaq politikkikkullu assortuuttarnerit pissutigalugit eqqartuussinissaq kinguartinneqaqattaartuarsimavoq. Eqqartuussinissamut pissutissaqarluartoq tamanit isumaqatigiissutigineqaraluarpoq, ukiunimi tallimani, 1975-imiit 1979-ip tungaanut, Khmer Rougemeersut kommunisme naapertorlugu naalakkersuilerniarsaritillugit, Cambodiamiut tallimararterutaat toqutaapput. Naqisimaneqarnerup, kaannerup toqoraanerullu kingorna Cambodiamiut 1,7 millionit inuunerannik akeqarpoq. Khmer Rougemi siuttuusimasoq, Pol Pot toqoreernikuuvoq, allalli skisussaaqataasut maanna utoqqaliarsaartut tallimat eqqartuunneqalerput. Naalliutsitsiviusarsimasumi Knom Pehn-imiittumi pisortaasimasoq, taaneqartartoq, Deuch, siulliulluni eqqartuunneqalerpoq. Ullumilu sassarami atuarfimmi pisortaagallarnermisut isikkoqarpoq, tassa taanna atuarfik kingoarna paarnaarussivinngortillugu naalliutsitsivigisarsimavaa. Paarnaarussivimmi tassani inuit 12.000-it naalliutsinneqartarsimapput, kingornalu illoqarfiup avataani, Killing Fields-inik taaneqartartumi toqunneqartarsimallutik. Inuit 12.000-it paarnaarusimaneqarsimasut ilaminiinnanngui aniguipput. Deuch-ip ajortuliani nassuerutiginagit utoqqatsiinnarsimavoq. Deuch-ip eqqartuunneqarnerani nalunnginnittut 90-it sassartinneqartinnagit inatsisit suut qanoq ittullu naapertorlugit eqqartuussineq ingerlanneqassanersoq sammineqaqqaarallassapput. Aatsaallu tamakkua naammassineqareerpata sooq qanoq ilillunilu mumisitsiniarneq taama peqqarniitsigisimanersoq tusarneqarsinnaalissaaq.
