Californiami qatserisartut orpippassuit ikuallannerat qamikkallarsinnaanagu nassuerutigiinnarpaat

Soorlu Grækenlandimi aasaq nunap ikuallannera arriitsumik annertusiartuaartoq, maanna aamma Californiami ikuallanneq annertusiartuinnarpoq. Californiap avannaani Santa Barbaramiit kujammut San Diegomut, Mexicomut killeqarfiup eqqaaniittumut, ullut sisamassaat ikuallanneq siaruaakkiartuaarpoq. San Diegop eqqaani ikuallanneq ajoqusiinerpaavoq, tamaani angerlarsimaffiit 350.000-it inuisa qimaannartariaqarmatigit, mannalu tikillugu illut 1.500-ut ikuallareerput. Angerlarsimaffeeruttut ilaat 12.000-it arsaattarfissuarmi sinngupput, sulilu allat tusintillit arsaattarfiup eqqannguani biilit uninngasarfiani unnuisarfimminni angallattakkaniillutik. Danmarks Radiomi ilanngutassiortoq Allan Bo Poulsen oqaluttuarpoq, angerlarsimaffeerussimasut eqqissisimasut. Inuit nunap ikuallanneranik aatsaat takulinngillat, anorili Arizonap inoqajuitsortaaneersoq, Santa Annamik taaneqartartoq, sakkortoqimmat ikuallanneq akiorneqarsinnaanngilaq, naatsorsuutigineqarporlu suli sapaatip akunnera orpippassuit nunalu ikuallakkallassasut. Qatserisartut 10.000-it qamisaajunnaaginnarlutik illunik ikuallannaveersaartitsiinnalerput.