California: Orpippassuit ikuallattut ajornartorsiortitsipput

Ikuallannernit inuit pingasut ajoquserneqarput, illullu 4.000-it inuerutsinneqartut, Californiami guvernøri; Arnold Schwarzenegger ippassaq oqaatigaa, naalagaaffimmilu sakkortuumik naalakkersuisoqalernera nalunaarutigalugu.

Orpippassuit ikuallattut ilaat, illoqarfissuarmit millionilikkaanik inulimmit Los Angelesimit kilometerialuinnarnik ungasissusilimmiipput, qatserisartullu oqaatigaat "nakkutigineqarsinnaanngitsut". Nuna 8.000 hektarinik annertussusilik maanna ikuallareersoq oqaatigineqarpoq.

Qatserisartut 1.800-t qamisaaniarsaripput, timmisartunit ikuallaffinnut imermik nakkartitsisarlutik qamisaasunik ikiorserneqarlutik. Illut katillugit 10.000-it ikuallannernit navianartorsiortinneqarput.

Kiannerujussua ikuallannernut ikummarinnerulersitsivoq, ullunilu tulliuttuni taamaakkallarnissaa naatsorsuutigineqarpoq.

Ikuallannerit 5 procentiinnaasa nakkutigineqarsinnaanerat, oqartussanit nassuerutigineqarpoq.

California orpippassuit ikuallannerinit eqqugaakkajuttuuvoq, 2007-imilu aatsaat taamak annertutigisumik orpippassuit ikuallammata, innuttaasut 640.000-it oqartussanit qimarngussuunneqarput. Taamanilu illut 2000-it innermit aserorluinnarneqarput.