Cairo-mi eqqissiviilliornerit ingerlaannarput

Ullumi Cairomi Mubarakimut akerliusut tapersersuisullu aporaattareermata aqagu tallimanngonermi qinoqatigiittoqareerpat perulluliortoqaqqinnissaa aarleqqutigineqarpoq.
februaarip 03-at 2011 16:03

Egyptenimi illoqarfiit pingaarnersaat puffassimaarfioqaaq, tusagassiortullu nunanit allaneersut arlallit Mubarakip tapersersortaasa saassuttarsimavaat.

Ullumi tusagassiortut Al Jazeerameersut marluk Mubarakip tapersersortaannit saassunneqarput allallu marluk Grækenlandimeersut saassuneqarsimapput, aappaa quttoqqamigut qinneriaammik kapitissimavoq aappaalu pikattarneqarsimalluni.

Henrik Lerche Cairomiit nalunaarpoq tusagassiortut nunanit allaneersut saassunneqaqattaartut, pisut malinnaaffigalugit ilanngutassiorniartut pikattarneqartarput biiliniittulluunniit saassunneqartarlutik. Nunanit allaneersut pisut pillugit ilanngutassiornissaat inupiluuserniartunit nuannarineqanngilaq ilanngutassiorniartulli ilaat aamma paarnaarussaasarput.

Ullumi sukkut tamaana aporaattoqallattaarpoq ujaqqanillu milloortoqarnerulluni. Mubarakimik tapersersuisut akerlerinnittullu ullaarli sakkutuunit aporaannaveersaartinneqarput.

Aqaguli tallimangornerussaaq aallakaanerit ulluattut illuatungiliuttunit taagorneqartoq, tassa ulloq Mubarakip qimaalluni aallanngikkuni tunuarfissaa.

Aqagu tallimanngornermi qinoqatigiittoqareerpat akerliuniartorpassuaqarnissaa ilimagineqarpoq, taakkuali Mubarakip tapersersortaanit taakkualu malittaannit inupiluuserniartunit saassunneqarnissaat ilimagineqarpoq. Taamaasilluni sakkortuumik aporaattoqarnissaa pinngitsoorneqarsinnaagunanngilaq.