Cairnip piginneqataassutini tunisinnaanngussavaa
Cairn Energyp piginneqataassutiminik tunisaqarsinnaanissaanik Indiami naalakkersuisunit akuerineqarnissaa ilimagineqarpoq, akiliutaasartulli nutaamik aaqqissuunneqarnissaat, Indiap uuliasiortitseqatigiiffiata kissaatigaa. Aviisip The India Timesip nittartagaani tamanna atuarneqarsinnaavoq.
Cairn Energyp Vedanta Ressourcesillu siornatigut tamanna akerlerisimavaat. Uuliasiortitseqatigiiffiummi sinneqartoorutaasa annikillinissaat uuliasiortitseqatigiiffiit taakku marluk aarleqqutigaat.
Akiliutigineqartartut aaqqissuuteqqinneqarnissaat siorna aggustimi siullermik saqqummiunneqarput, Cairn Energyllu aallaqqaammulli illuatungiliussimapput, Indiap oqartussaasuinit akuersiteqqaarnissaq akerlileramikku.
Piginneqatiginnissutinik tuniniaaneq Cairn Energyp Nunatsinni misiliilluni qilleriniarneranut sunniuteqassangatinneqarpoq, aningasat isertitsissutaasut qillerinissanut atorneqarsinnaalissammata.