Cairnip milliarderpassuit sinnattoriinnarsinnaavai

Tuluit aatsitassarsiortitseqatigiiffiata, Vedanta Ressourcesip, Cairn Energyp Indiami immikoortortaani, Cairn Indiami, piginneqataassutit amerlanersaannik pisinissani piffissami sivisuumi soqutigisimavaa.

Kisianni soorluuna Vedantap isumaa allanngorsimasoq, pisiarinninnissaminillu tunuartilerluni. Economic Times of India taama allappoq.

Tamanna Nunatsinniit isigalugu ilungersunarpoq, Cairn Energy-p tunisinermi aningaasat pissarsiassani Nunatsinni uuliasiornermut atortussaagaluarmagit. Cairn Enegyp Nunatsinni uuliasiornini milliardilikkaanik attartorluni maannamut aningaasalersorpaa.

Kisianni tusakkat Cairn Energymut aallaqqaammut nutaarsiassaapput nuanninngitsut.

Tuniniaanerup iluatsinngitsuulerneranik tusatsiakkat Cairn Energymi piginneqataassutit nalingi ullumi 11 procentpointinik appartippai. Piginneqataassutit malunnaateqartut nalingisa Londonip Børseniani tuniniaanermi ullumi appartut malunnarnersaraat.

- Vedanta pisinissamit tunuartilernersoq oqallisaammat,

Cairn Energy Indiami tusatsiakkanit eqqornerlunneqaqaaq, Mic Mills tusagassaqartitsivimmut Reutersimut oqarpoq. Taanna ETX Capitalimi piginneqataassutit naliginik nalilersuisartuuvoq.

Vedantap pisinissaminut eqqarsaqqaarniarneranut suna peqqutigineraa ersarluppoq. Kisianni tusagassiorfiit nunani assigiinngitsuneersut naapertorlugit tamanna peqquteqarpoq, Indiami oqartussat arlalinnik piumasaqaateqarsimammata, taakkualu naammassineqarpata aatsaat, tunisinissaq pisortanit akuersissutigineqassalluni.

Vedanta piginneqataassutinik pisinissani piviusunngortippagu, Cairn Energy 8,5 milliardi dollarsinik pissarsissaaq.

Cairn Energy siusinnerusukkut ilisimatitsereerpoq, piginneqataassutinik tunisinissani ukioq manna qaammatini siullerni pingasuni naammassissallugu. Kisianni tunisinissaq sapaatit akunnerinik marlunnik sivitsuilluni apriilip 15-anut kinguartippaa.