Cairnip kullua pissangallutik utaqqivaat

Sanaartugassat annertuut aallartissinnaapput Cairn nunatsinni uuliasiornermi ingerlatseqqinniarluni aalajangissappat.

Cairn Energyp uuliasiorluni ukiormanna nunatsinni qillerinera ullut arlaqanngitsut qaangiuppata unissaaq. Politikkerit suliffeqarfiillu pissangallutik utaqqivaat aappaagu pisussat, sanaartornissamullu pilersaarutit annertuut piareersarneqalereerput.

Qaasuitsup Kommunia illoqarfinni arlalinni nunaminertanik immikkoortitsiniarluni tusarniaavoq taakku inuussutissiornermut atorusullugit, taakkunalu Aasiaat annertunerpaamik pilersaarfigineqarput. Tassani qeqertaq Tupilak 2 millioner kvadratmeterit sinnerlugit angissusilik uuliasiornermi sulisunut atugassiissutiginiarneqarpoq.

- Imatut nunaminertanik atuinissamut qinnuteqaatinik suli tigusaqanngikkaluarpugut, kisianni ilimasaarneqareerpugut suliffeqarfiit arlallit nunaminertanik atuinissamut pilerisuttut, Qaasuitsup Kommuniani kommunalbestyrelsemi inuussutissarsiornermut ataatsimiititaliami siulittaasoq Peter Olsen oqarpoq.

- Tusarniaaneq maanna aallartereerparput pisussanut piareersimaneruniarluta. Nalunngilarput nunaminertanik atuinissamik qinnuteqartoqartillugu piffissarujussuaq atorneqarsinnaasartoq. Maanna tusarniaaneq ingerlatereerparput saaffiginnittoqassappat piaarnerpaamik aalajangiisinnaajumalluta, Peter Olsen oqarpoq.

Utaqqimaarput
Uuliasiortunik sullissinissamik soqutiginnittut ilagaat Arctic Base Supply Mærsk-ikkut pigisaannit Danbor Service A/S-imit piginneqataaffigineqartoq, tassanilu Royal Arctic Line piginneqataavoq. Suliffeqarfiit taanna Cairn Energyp uuliasiornerani sullissisareerpoq skottit uuliasiortitseqatigiiffiata taassuma Qeqertarsuup avataani uuliasiornerani.

Maanna Arctic Base Supply pissangalluni utaqqivoq Cairn Energyp 2012-mut pilersaarutinik saqqummiussinissaanut. Arctic Base Supply Aasianni nunaminertamik qinnuteqarsimagaluarpoq peqqumaasiliornissamut atugassaminik Aasiannik umiarsualivik tattoqisaannarpallaalermat.

- Maannali aningaasaliiffissat annertuut mianersorfigigallarpgut. Pissangalluta utaqqivagut Cairnip aappaagumut pilersaarutai. Allatut oqaatigalugu: Utaqqimaarallarpugut, Arctic Base Supply-mi pisortaaneq Steen O. Hansen KNR-imut oqarpoq.

Cairn Energy-li kisimiinngilaq nunatta imartaani uuliasiornissamik soqutiginnittuni.

- Nalunngilarput Husky Energy uuliasiornissamik soqutiginnittoq taamatullu ippoq aamma Shell. Taamaammat ukiut aggersut pissanganartorujussuupput, Peter Olsen oqarpoq.

Maannali tassa kikkut tamarmik utaqqivaat ukiut marluk nunatta imartaani uuliasioreerluni Cairn Energyp naliliinissaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat