Cairnip kalaallinik sulisussaaleqinera SIK-p tupaallaatigaa

Suliffissanut aningaasagissunut kalaallit asuliinnaq utaqqineqaraluartut, uuliasiortitseqatigiiffik Cairn Energy nalunaartoq ullaaq Radioaviisimi oqaatigineqarpoq. Taakkua kalaallinik sulisussarsiortaraluarlutik iluatsitsivallaanngillat.

Jess G. Berthelsen isumaqarpoq Cairn Energy nunatsinni soqutigisaqaqatigiinik oqartussanillu suleqateqarnerusariaqartoq.

- Qulequtaq taanna takugakku assorujussuaq tupassimavunga, tassami maannakkut nunatsinni suliffissaaleqineq annertutigisoq, sulisussanik pissarsisarsimanngimmata, Jess G Berthelsen oqarpoq.

Cairn Energy nunatsinni ulapaarnerpaagami 2010-mi qillerinermini sulisorisaasa tamarmiusut 7,1 procentiinnai nunatsinneersuusut, Sermitsiami allaaserineqarpoq.

Tassalu uuliasiornermi sulisut 14-iugaangata ataaseq kisimi kalaaliusimavoq.

Suliassat ilaat ilinniagaqanngikkaluanit suliarineqarsinnaapput, allalli ilinniagalinnit taamaallaat suliarineqarsinnaallutik.

Jess G. Berthelsen Cairn Energy maanna kaammattorpaa, nunatsinni sulisoqarnermi kattuffiit oqartussallugu suleqatiginiaqqullugit, taamaalillutik kalaallinik amerlanerusunik sulisoqalerniassagamik.

- Sulisussarsiornerminni periaaseq suna atorsimaneraat ilisimanngilara. Kisianni immaqa kommuunerujussuit, uagut suleqatigaluta, GA aamma sulisitsisut allat suleqatigalugit sulisussanik pissarsiortarsinnaappata iluatsitsinerussagaluarput. Taamaattumik tamatta soqutigisariaqarparput Cairn Energy eqqarsaatigalugu, sulisussanik pissarsisinnaanissaat. Taamaalilluni massakkut suliffissaaleqineq nunatsinni annertoqisoq annikillisarneqarsinnaaniassammat, Jess G. Berthelsen oqarpoq.

Kalaallit inuusuttut najugaqarfigisamik qanittuini sulinissartik kissaatiginartinnerusaraat, Cairn Energymi pisortaq Ian Watt isumaqarpoq.

Kisianni nunatsinni sulisartut siuttuat taama isumaqanngilaq:

- Inuussuttagut kajumissaarneqarsinnaapput tassuuna allanik misigisaqarusukkunik. Soqutiginassuseq, pilerinassuseq nunanilu allani angalasinnaaneq periarfitsialassuusoq takutsinneqartariaqarpoq, Jess G. Berthelsen oqarpoq.