Cairn: Taama ajortigisumik pisoqarsinnaavoq
Pilersaarummi Cairn Energyp ilaatigut nalunaarusiorsimavaa uuliamik maqisoorluni ajutoornerit qanoq ittut pilersinnaanersut aamma qanoq ajoqusiisinnaatigisut. Ajoqusiisinnaaneranut naliliinermi avatangiisit ajoquserneqarsinnaanerat kisimi pineqanngilaq, uuliasiortitsileqatigiiffiummi nunarsuarmi tusaamaneqarnerata aammalu qillerisinnaanermut periarfissaanik ajoquusisinnaanera aamma eqqarsaatigineqarsimammat.
Cairn Energyp ajornerpaamik pisoqartillugumik assersuusiornermini, assersuutigisimavaa uulia nappartat 5000-it ullut tamaasa ulluni 37-ni imaanut maqinera. Taama pisoqaratarsinnaanera ilimanaateqanngilluinnartoq upalungaarsimanissamut pilersaarummi allaaserineqarpoq. Tassami ajutoornerit taama annertutigisut ukiut 100-rujut ingerlanerani qillerinerni ataasiaannarlutik pisarnissaat ilimagineqarmat.
Taamatulli pisoqassappat ajorluinnartumik pisoqarnissaa naatsorsuutigineqarpoq. Tassami uumasut nungutaanissaminnut ulorianartorsiortinneqartut nungutinneqavinneranik imaluuniit uumasut pingaartinneqartut nungutaanissaminnulluunniit ulorianartorsiortinneqartut ajoquserneqarneranik kinguneqarsinnaammat. Tamatumalu kinguneranik uumasoqatigiit nerisareqatigiiarnerata ajoquserneqarnera kiisalu nunap allanngortinneqarneranik kinguneqarsinnaasoq allaaserineqarpoq. Ilaatigullu aamma nunarsuarmioqatigiit kingornussatut toqqarsimasaasa eqqorneqarsinnaanerat eqqaaneqarpoq. Matumanilu Ilulissat Kangerluat pineqarsimassasoq ilimanarpoq.
Upalungaarsimanermut pilersaarummi avatangiisit ajorluinnartumik eqqorneqarsinnaanerat kisimi eqqartorneqanngilaq. Akerliussutsimik takutitsinerit, mattussinerit, eqqartuussiviit qillerivinnik matusisut, nunat qillerisinnaanermut akuersissutinik utertitsisut, inerteqqussutit, eqqartuussivilersuussinerit, nunani tamalaani tusagassiorfiit suliniaqatigiiffiillu malersuisut. Tamakkuupput pilersaarummi allaaserineqartut ilaat.
Taamaakkaluartorli aamma pilersaarummi erserpoq annikitsumik maqisoortoqaratarsinnaanera pisinnaasoq. Nalilerneqarpormi qillerinerup ataatsip ingerlanerani suungaluarnersumik pinngitsoorani maqisoqarumaartoq. Taamaalisoqassappallu Cairn Energyp naatsorsuutigivaa annikitsumik akiligassinneqartarnissani, avatangiisit ataavartumik ajoquserneqassanngitsut, tusaamaneqarnera taamaallaat nunaqavissunit allanngussasoq aammalu pisortanit nakkutigineqarnerulerneq.
