Cairn sinneqartoorujussuarpoq
Cairnip Indiamut uuliorfimminik tunisinera taama kusanartigisumik sinneqartoornermut pissutaavoq.
Kalaallit Nunaanni misileraalluni uuliasiornerminnut atatillugu, qillerinerit suli iluatsissimannginnerat suliffeqarfiup nassuerutigaa. Kisianni Kalaallit Nunaatani avataani uuliaqarnera misissuinerit tamarmik paasinarsisikkaat aalajangiusimavaat.
Maannamut qillerinerit suliffeqarfiup paasissutissarpassuarnik ilisimasassanillu nalissaqanngitsunik pissarsiffigigai oqaatigaat, Kalaallit Nunaannilu iluatsitsinissartik upperalugulu suli naatsorsuutigigitsik aamma oqarlutik.
Baffinip Kangerliumarngani, Pitumi, misileraallutik tullianik qillerilerunik uuliasiortitseqatigiiffiup Statoilip peqataaniarnera Cairnip aamma nuannaarutigaat.
Baffinip Kangerliumarngani qaqugorpiaq qillerisoqassanersoq suli nalunarallarpoq, Pitumili sajuppillatsitsisarnernit paasissutigissat pigilikkat ukioq-manna maajimi juunimilu misissorluarneqareerpata, tamanna aalajangerneqarumaartoq, Cairn Energymit ukiumoortumik nalunaarusiami, ullaaq-manna saqqummiunneqartumi, allassimavoq.
Ammali Radioaviisimut erseqqissarpaat, uuliasiornissamut akuersissuteqarfigisaminni sajuppillatsitsillutik 2012-imi misissuiniannginnamik, paasissutissarpassuit maanna pigileriikkatik misissorluarniaraminnik. Cirn Energy-miit Christian Goodbody ullup qeqqata siorna taama allappoq.
