Aasaq-manna qillerinermi paasisat sapaatit akunneri arlaqanngitsut qaangiuppata nalunaarutigineqassapput, uuliasiortitseqatigiiffik radioaviisimut nalunaarpoq.
- Cairn Energyp aasaq-manna qillerinini Aatsitassaqarnermut Pisortaqarfillu isumaqatigiissutertik eqqortillugu naammassivaa. Qillerinermi atortut maanna piiarpavut aasaq-mannalu qillerinermi paasisat maanna misissoqqissaarlugit aallartippavut, uuliasiorfik nalunaarummini taama allappoq.
Aasaq-manna qillerinermi paasisat misissorneqartut sapaatit akunneri arlaqanngitsut qaangiuppata nalunaarutigineqarumaartut uuliasiortitseqatigiiffik allappoq.
- Misissuineritta inernerat pillugu paasissutisseeqqinnissarput sapaatit akunneri marlussuit qaangiuppata pissasoq pilersaarutigaarput.
Uuliasiortitseqatigiiffik kingullermik septembarip 21-anni paasissutissiivoq. Qillerivimmi Alpha-mi uuliamik nassaarsimallutik Cairn Energyp taamani nalunaarutigaa, aamma qillerivik T8-1 gassimik annikitsuinnarmik nassaarfiusoq unitsiinnarneqarsimasoq kiisalu qillerivimmi T4-1-imi qillerineq suli ingerlasoq nalunaarutigalugu.
Stena Don-ip sapaatiummat unnukkut Qeqertarsuup avataa qimatsilerpaa. Qillerivimmi sulisut ilaata ataata radioaviisimut mailimi allalluni taama paasissutissiivoq.
Qillerivimmi Alpha-mi uuliamik nassaarneq nalunaarutigineqarmat Nunaoil-imi pisortaq Hans Kristian Olsen oqarpoq, paasisaq taanna "sivittajaamik" nammineq ilisimasimallugu.
Qillerinermi misissueqqissaarnermi paasisat aamma ilisimalereersimallugit ullaaq manna oqarpoq, tusarliussassarli tusaruminartuunersoq pakatsinartuunersoorluunniit oqaatigiumanngilaa.